Read Nova_Vulgata Exodus 22 Bible Online

Exodus 22 - Nova_Vulgata bible

Exodus 22

¹Si effringens fur domum sive suffodiens fuerit inventus et, accepto vulnere, mortuus fuerit, percussor non erit reus sanguinis.

²Quod si orto sole hoc fecerit, erit reus sanguinis. Fur plene restituet. Si non habuerit, quod reddat, venumdabitur pro furto.

³Si inventum fuerit apud eum, quod furatus est, vivens sive bos sive asinus sive ovis, duplum restituet.

⁴Si quispiam depasci permiserit agrum vel vineam et dimiserit iumentum suum, ut depascatur agrum alienum, restituet plene ex agro suo secundum fruges eius; si autem totum agrum depastum fuerit, quidquid optimum habuerit in agro suo vel in vinea, restituet.

⁵Si egressus ignis invenerit spinas et comprehenderit acervos frugum sive stantes segetes sive agrum, reddet damnum, qui ignem succenderit.

⁶Si quis commendaverit amico pecuniam aut vasa in custodiam, et ab eo, qui susceperat, furto ablata fuerint, si invenitur fur, duplum reddet.

⁷Si latet fur, dominus domus applicabitur ad Deum et iurabit quod non extenderit manum in rem proximi sui.

⁸In omni causa fraudis tam de bove quam de asino et ove ac vestimento et, quidquid damnum inferre potest, si quis dixerit: “ Hoc est! ”, ad Deum utriusque causa perveniet, et, quem Deus condemnaverit, duplum restituet proximo suo.

⁹Si quis commendaverit proximo suo asinum, bovem, ovem vel omne iumentum ad custodiam, et mortuum fuerit aut fractum vel captum ab hostibus, nullusque hoc viderit,

¹⁰iusiurandum per Dominum erit in medio quod non extenderit manum ad rem proximi sui; suscipietque dominus iuramentum, et ille reddere non cogetur.

¹¹Quod si furto ablatum fuerit, restituet damnum domino;

¹²si dilaceratum a bestia, deferat, quod occisum est, in testimonium et non restituet.

¹³Qui a proximo suo quidquam horum mutuo postulaverit, et fractum aut mortuum fuerit, domino non praesente, reddere compelletur.

¹⁴Quod si impraesentiarum dominus fuerit, non restituet. Si mercennarius est, venit in mercedem operis sui.

¹⁵Si seduxerit quis virginem necdum desponsatam dormieritque cum ea, pretio acquiret eam sibi uxorem.

¹⁶Si pater virginis eam dare noluerit, appendet ei pecuniam iuxta pretium pro virginibus dandum.

¹⁷Maleficam non patieris vivere.

¹⁸Qui coierit cum iumento, morte moriatur.

¹⁹Qui immolat diis, occidetur, praeter Domino soli.

²⁰Advenam non opprimes neque affliges eum; advenae enim et ipsi fuistis in terra Aegypti.

²¹Viduae et pupillo non nocebitis.

²²Si laeseritis eos, vociferabuntur ad me, et ego audiam clamorem eorum;

²³et indignabitur furor meus, percutiamque vos gladio, et erunt uxores vestrae viduae et filii vestri pupilli.

²⁴Si pecuniam mutuam dederis in populo meo pauperi, qui habitat tecum, non eris ei quasi creditor; non imponetis ei usuram.

²⁵Si pignus a proximo tuo acceperis pallium, ante solis occasum reddes ei;

²⁶ipsum enim est solum, quo operitur, indumentum carnis eius, nec habet aliud, in quo dormiat; si clamaverit ad me, exaudiam eum, quia misericors sum.

²⁷Deo non detrahes et principi populi tui non maledices.

²⁸Abundantiam areae tuae et torcularis tui non tardabis reddere. Primogenitum filiorum tuorum dabis mihi.

²⁹De bobus quoque et ovibus similiter facies: septem diebus sit cum matre sua, die octavo reddes illum mihi.

³⁰Viri sancti eritis mihi; carnem animalis in agro dilacerati non comedetis, sed proicietis canibus.