Read Nova_Vulgata Exodus 25 Bible Online

Exodus 25 - Nova_Vulgata bible

Exodus 25

¹Locutusque est Dominus ad Moysen dicens:

²“ Loquere filiis Israel, ut tollant mihi donaria; ab omni homine, qui offert ultroneus, accipietis ea.

³Haec sunt autem, quae accipere debetis: aurum et argentum et aes,

⁴hyacinthum et purpuram coccumque et byssum, pilos caprarum

⁵et pelles arietum rubricatas pellesque delphini et ligna acaciae,

⁶oleum ad luminaria concinnanda, aromata in unguentum et in thymiama boni odoris,

⁷lapides onychinos et gemmas ad ornandum ephod ac pectorale.

⁸Facientque mihi sanctuarium, et habitabo in medio eorum.

⁹Iuxta omnem similitudinem habitaculi, quam ostendam tibi, et omnium vasorum in cultum eius: sicque facietis illud.

¹⁰Arcam de lignis acaciae compingent; cuius longitudo habeat duos semis cubitos, latitudo cubitum et dimidium, altitudo cubitum similiter ac semissem.

¹¹Et deaurabis eam auro mundissimo intus et foris; faciesque supra coronam auream per circuitum

¹²et conflabis ei quattuor circulos aureos, quos pones in quattuor arcae pedibus: duo circuli sint in latere uno et duo in altero.

¹³Facies quoque vectes de lignis acaciae et operies eos auro;

¹⁴inducesque per circulos, qui sunt in arcae lateribus, ut portetur in eis;

¹⁵qui semper erunt in circulis nec umquam extrahentur ab eis.

¹⁶Ponesque in arcam testimonium, quod dabo tibi.

¹⁷Facies et propitiatorium de auro mundissimo; duos cubitos et dimidium tenebit longitudo eius, et cubitum ac semissem latitudo.

¹⁸Duos quoque cherubim aureos et productiles facies ex utraque parte propitiatorii,

¹⁹cherub unus sit in latere uno et alter in altero; ex propitiatorio facies cherubim in utraque parte eius.

²⁰Expandent alas sursum et operient alis suis propitiatorium; respicientque se mutuo, versis vultibus in propitiatorium,

²¹quo operienda est arca, in qua pones testimonium, quod dabo tibi.

²²Et conveniam te ibi et loquar ad te supra propitiatorium de medio duorum cherubim, qui erunt super arcam testimonii, cuncta, quae mandabo per te filiis Israel.

²³Facies et mensam de lignis acaciae habentem duos cubitos longitudinis et in latitudine cubitum et in altitudine cubitum ac semissem.

²⁴Et inaurabis eam auro purissimo; faciesque illi coronam auream per circuitum.

²⁵Facies quoque ei limbum altum quattuor digitis per circuitum et super illum coronam auream.

²⁶Quattuor quoque circulos aureos praeparabis et pones eos in quattuor angulis eiusdem mensae per singulos pedes.

²⁷Iuxta limbum erunt circuli aurei, ut mittantur vectes per eos, et possit mensa portari.

²⁸Ipsosque vectes facies de lignis acaciae et circumdabis auro, et per ipsos subvehitur mensa.

²⁹Parabis et acetabula ac phialas, vasa et cyathos, in quibus offerenda sunt libamina, ex auro purissimo.

³⁰Et pones super mensam panes propositionis in conspectu meo semper.

³¹Facies et candelabrum ductile de auro mundissimo: basis et hastile eius, scyphi et sphaerulae ac flores in unum efformentur.

³²Sex calami egredientur de lateribus, tres ex uno latere et tres ex altero.

³³Tres scyphi quasi in nucis modum in calamo uno sphaerulaeque simul et flores; et tres similiter scyphi instar nucis in calamo altero sphaerulaeque simul et flores: hoc erit opus sex calamorum, qui producendi sunt de hastili.

³⁴In ipso autem hastili candelabri erunt quattuor scyphi in nucis modum sphaerulaeque et flores.

³⁵Singulae sphaerulae sub binis calamis per tria loca, qui simul sex fiunt, procedentes de hastili uno.

³⁶Sphaerulae igitur et calami unum cum ipso erunt, totum ductile de auro purissimo.

³⁷Facies et lucernas septem et pones eas super candelabrum, ut luceant in locum ex adverso.

³⁸Emunctoria quoque et vasa, in quibus emuncta condantur, fient de auro purissimo.

³⁹Omne pondus candelabri cum universis vasis suis habebit talentum auri purissimi.

⁴⁰Inspice et fac secundum exemplar, quod tibi in monte monstratum est.