Read Nova_Vulgata Exodus 29 Bible Online

Exodus 29 - Nova_Vulgata bible

Exodus 29

¹Sed et hoc facies eis, ut mihi in sacerdotio consecrentur: tolle vitulum unum de armento et arietes duos immaculatos

²panesque azymos et crustulas absque fermento, quae conspersa sint oleo, lagana quoque azyma oleo lita; de simila triticea cuncta facies

³et posita in canistro offeres, vitulum quoque et duos arietes.

⁴Aaron ac filios eius applicabis ad ostium tabernaculi conventus. Cumque laveris patrem cum filiis suis aqua,

⁵indues Aaron vestimentis suis, id est subucula et tunica ephod et ephod et pectorali, quod constringes ei cingulo ephod;

⁶et pones tiaram in capite eius et diadema sanctum super tiaram

⁷et oleum unctionis fundes super caput eius; atque hoc ritu consecrabitur.

⁸Filios quoque illius applicabis et indues tunicis lineis cingesque balteo

⁹et impones eis mitras; eruntque sacerdotes mihi iure perpetuo. Postquam impleveris manus Aaron et filiorum eius,

¹⁰applicabis et vitulum coram tabernaculo conventus; imponentque Aaron et filii eius manus super caput illius,

¹¹et mactabis eum in conspectu Domini, iuxta ostium tabernaculi conventus.

¹²Sumptumque de sanguine vituli, pones super cornua altaris digito tuo, reliquum autem sanguinem fundes iuxta basim eius.

¹³Sumes et adipem totum, qui operit intestina, et reticulum iecoris ac duos renes et adipem, qui super eos est, et offeres comburens super altare;

¹⁴carnes vero vituli et corium et fimum combures foris extra castra, eo quod pro peccato sit.

¹⁵Unum quoque arietem sumes, super cuius caput ponent Aaron et filii eius manus;

¹⁶quem cum mactaveris, tolles sanguinem eius et fundes super altare per circuitum.

¹⁷Ipsum autem arietem secabis in frusta lotaque intestina eius ac pedes pones super concisas carnes et super caput illius.

¹⁸Et adolebis totum arietem super altare: holocaustum est Domino, odor suavissimus, incensum est Domino.

¹⁹Tolles quoque arietem alterum, super cuius caput Aaron et filii eius ponent manus;

²⁰quem cum immolaveris, sumes de sanguine ipsius et pones super extremum auriculae dextrae Aaron et filiorum eius et super pollices manus eorum ac pedis dextri; fundesque sanguinem super altare per circuitum.

²¹Cumque tuleris de sanguine, qui est super altare, et de oleo unctionis, asperges Aaron et vestes eius, filios et vestimenta eorum cum ipso. Et sanctus erit ipse et vestimenta eius et filii eius et vestimenta eorum cum ipso.

²²Tollesque adipem de ariete et caudam et arvinam, quae operit intestina, ac reticulum iecoris et duos renes atque adipem, qui super eos est, armumque dextrum, eo quod sit aries consecrationis,

²³tortamque panis unam, crustulam unam conspersam oleo, laganum unum de canistro azymorum, quod positum est in conspectu Domini;

²⁴ponesque omnia super manus Aaron et filiorum eius, ut agitent ea coram Domino.

²⁵Suscipiesque universa de manibus eorum et incendes in altari super holocausto in odorem suavissimum in conspectu Domini; quia incensum est Domino.

²⁶Sumes quoque pectusculum de ariete, quo initiatus est Aaron, elevabisque illud coram Domino; et cedet in partem tuam.

²⁷Sanctificabisque pectusculum elevatum et armum oblatum, quem de ariete separasti,

²⁸quo initiatus est Aaron et filii eius; cedentque in partem Aaron et filiorum eius iure perpetuo a filiis Israel; quia oblatio est et oblatio erit a filiis Israel de victimis eorum pacificis, oblatio eorum Domino.

²⁹Vestem autem sanctam, qua utetur Aaron, habebunt filii eius post eum, ut ungantur in ea, et impleantur in ea manus eorum.

³⁰Septem diebus utetur illa, qui pontifex pro eo fuerit constitutus de filiis eius, qui ingredietur tabernaculum conventus, ut ministret in sanctuario.

³¹Arietem autem consecrationis tolles et coques carnes eius in loco sancto.

³²Et vescetur Aaron et filii eius carnibus arietis et panibus, qui sunt in canistro, in vestibulo tabernaculi conventus.

³³Et comedent ea, quibus expiatio facta fuerit ad implendum manus eorum, ad sanctificandum eos. Alienigena non vescetur ex eis, quia sancta sunt.

³⁴Quod si remanserit de carnibus consecrationis sive de panibus usque mane, combures reliquias igni; non comedentur, quia sancta sunt.

³⁵Omnia, quae praecepi tibi, facies super Aaron et filiis eius. Septem diebus consecrabis manus eorum

³⁶et vitulum pro peccato offeres per singulos dies ad expiandum. Mundabisque altare expians illud et unges illud in sanctificationem.

³⁷Septem diebus expiabis altare et sanctificabis; et erit sanctum sanctorum: omnis, qui tetigerit illud, sanctificabitur.

³⁸Hoc est quod facies in altari: agnos anniculos duos per singulos dies iugiter,

³⁹unum agnum mane et alterum vespere;

⁴⁰decimam partem similae conspersae oleo tunso, quod habeat mensuram quartam partem hin, et vinum ad libandum eiusdem mensurae in agno uno.

⁴¹Alterum vero agnum offeres ad vesperam iuxta ritum matutinae oblationis et libationis in odorem suavitatis, incensum Domino,

⁴²holocaustum perpetuum in generationes vestras, ad ostium tabernaculi conventus coram Domino, ubi conveniam vos, ut loquar ad te.

⁴³Ibi conveniam filios Israel, et sanctificabitur locus in gloria mea.

⁴⁴Sanctificabo et tabernaculum conventus cum altari et Aaron cum filiis eius, ut sacerdotio fungantur mihi.

⁴⁵Et habitabo in medio filiorum Israel eroque eis Deus;

⁴⁶et scient quia ego Dominus Deus eorum, qui eduxi eos de terra Aegypti, ut manerem inter illos: ego Dominus Deus ipsorum.