Read Nova_Vulgata Iob 11 Bible Online

Iob 11 - Nova_Vulgata bible

Iob 11

¹Respondens autem Sophar Naamathites dixit:

²“ Numquid illi, qui multa loquitur, non et respondetur? Aut vir verbosus iustificabitur?

³Vaniloquium tuum viros tacere faciet, et, cum ceteros irriseris, a nullo confutaberis?

⁴Dixisti enim: “Purus est sermo meus, et mundus sum in conspectu tuo”.

⁵Atque utinam Deus ipse loqueretur tecum et aperiret labia sua tibi,

⁶ut ostenderet tibi secreta sapientiae et arcana consilia eius, et intellegeres quod multo minora quaerat a te, quam meretur iniquitas tua.

⁷Forsitan vestigia Dei comprehendes et usque ad perfectum Omnipotentem reperies?

⁸Excelsior caelo est, et quid facies? Profundior inferno, et quid cognosces?

⁹Longior terra mensura eius et latior mari.

¹⁰Si subverterit vel concluserit et coarctaverit, quis contradicet ei?

¹¹Ipse enim novit hominum vanitatem; et videns iniquitatem nonne considerat?

¹²Sed et vir vacuus cordatus fit, et homo tamquam pullum onagri nascitur.

¹³Tu autem, si cor tuum firmaveris et expanderis ad eum manus tuas,

¹⁴si iniquitatem, quae est in manu tua, abstuleris a te, et non manserit in tabernaculo tuo iniustitia,

¹⁵tunc levare poteris faciem tuam absque macula et eris stabilis et non timebis.

¹⁶Miseriae quoque oblivisceris et quasi aquarum, quae praeterierunt, recordaberis.

¹⁷Et quasi meridianus fulgor consurget tibi ad vesperam, et, cum te caligine tectum putaveris, orieris ut lucifer.

¹⁸Et habebis fiduciam, proposita tibi spe, et defossus securus dormies.

¹⁹Requiesces, et non erit qui te exterreat; et deprecabuntur faciem tuam plurimi.

²⁰Oculi autem impiorum deficient, et effugium peribit ab eis; et spes illorum exhalatio animae ”.