Read Nova_Vulgata Iob 21 Bible Online

Iob 21 - Nova_Vulgata bible

Iob 21

¹Respondens autem Iob dixit:

²“ Audite, quaeso, sermones meos, et sint haec consolationes vestrae.

³Sustinete me, et ego loquar; et post verba mea ridebitis.

⁴Numquid contra hominem disputatio mea est, ut merito non debeam impatiens fieri?

⁵Attendite me et obstupescite et superponite digitum ori vestro.

⁶Et ego, quando recordatus fuero, pertimesco, et concutit carnem meam tremor.

⁷Quare ergo impii vivunt, senuerunt confortatique sunt divitiis?

⁸Semen eorum permanet coram eis, et progenies eorum in conspectu eorum.

⁹Domus eorum securae sunt et pacatae, et non est virga Dei super illos.

¹⁰Bos eorum concepit et non abortivit, vacca peperit et non est privata fetu suo.

¹¹Egrediuntur quasi greges parvuli eorum, et infantes eorum exsultant lusibus.

¹²Tenent tympanum et citharam et gaudent ad sonitum organi.

¹³Ducunt in bonis dies suos et in puncto ad inferna descendunt.

¹⁴Qui dixerant Deo: “Recede a nobis! Scientiam viarum tuarum nolumus.

¹⁵Quis est Omnipotens, ut serviamus ei, et quid nobis prodest, si oraverimus illum?”.

¹⁶Sint in manu eorum bona sua; consilium vero impiorum longe sit a me.

¹⁷Quam saepe lucerna impiorum exstinguitur, et superveniet eis pernicies, et dolores dividet in furore suo?

¹⁸Erunt sicut paleae ante faciem venti, et sicut favilla, quam turbo dispergit.

¹⁹“Servabitne Deus filiis iniquitatem eius?”. Retribuat illi, ut sciat.

²⁰Videbunt oculi eius interfectionem suam, et de furore Omnipotentis bibet.

²¹Quid enim ad eum pertinet de domo sua post se, et si numerus mensium eius recidetur?

²²Numquid Deum docebit quispiam scientiam, qui excelsos iudicat?

²³Iste moritur robustus et sanus, dives et felix;

²⁴viscera eius plena sunt adipe, et medullis ossa illius irrigantur.

²⁵Alius vero moritur in amaritudine animae absque ullis opibus;

²⁶et tamen simul in pulvere dormient, et vermes operient eos.

²⁷Certe novi cogitationes vestras et sententias contra me iniquas.

²⁸Dicitis enim: “Ubi est domus principis, et ubi tabernacula impiorum?”.

²⁹Nonne interrogastis quemlibet de viatoribus et signa eorum non agnovistis?

³⁰Quia in diem perditionis servatur malus et ad diem furoris abducetur.

³¹Quis arguet coram eo viam eius, et, quae fecit, quis reddet illi?

³²Ipse ad sepulcra ducetur, et super tumulum vigilabunt.

³³Dulces erunt ei glebae vallis, et post se omnem hominem trahet et ante se innumerabiles.

³⁴Quomodo igitur consolamini me frustra, et responsionis vestrae restat perfidia? ”.