Read Nova_Vulgata Iob 28 Bible Online

Iob 28 - Nova_Vulgata bible

Iob 28

¹Habet argentum venarum principia et auro locus est, in quo conflatur.

²Ferrum de terra tollitur, et lapis solutus calore in aes vertitur.

³Terminum posuit tenebris et universorum finem ipse scrutatur, lapidem quoque caliginis et umbrae.

⁴Aperuit cuniculos gens peregrina, ipsique obliti sunt pedes, penduli haerent plus quam vir nutans.

⁵Terra, de qua oriebatur panis, in profundo subversa est sicut per ignem.

⁶Locus sapphiri lapides eius, et glebae illius aurum.

⁷Semitam ignoravit avis rapax, nec intuitus est eam oculus vulturis.

⁸Non calcaverunt eam filii superbiae, nec pertransivit per eam leaena.

⁹Ad silicem extendit manum suam, subvertit a radicibus montes.

¹⁰In petris canales excidit, et omne pretiosum vidit oculus eius.

¹¹Profunda quoque fluviorum scrutatus est et abscondita in lucem produxit.

¹²Sapientia vero ubi invenitur? Et quis est locus intellegentiae?

¹³Nescit homo structuram eius, nec invenitur in terra viventium.

¹⁴Abyssus dicit: “Non est in me”; et mare loquitur: “Non est mecum”.

¹⁵Non dabitur aurum obryzum pro ea, nec appendetur argentum in commutatione eius.

¹⁶Non appendetur auro Ophir nec lapidi sardonycho pretiosissimo vel sapphiro.

¹⁷Non adaequabitur ei aurum vel vitrum, nec commutabuntur pro ea vasa auri.

¹⁸Corallia et crystallum non memorabuntur comparatione eius; et possessio sapientiae potior margaritis.

¹⁹Non adaequabitur ei topazius de Aethiopia nec auro mundissimo componetur.

²⁰Unde ergo sapientia venit, et quis est locus intellegentiae?

²¹Abscondita est ab oculis omnium viventium, volucres quoque caeli latet.

²²Perditio et mors dixerunt: “Auribus nostris audivimus famam eius”.

²³Deus intellegit viam eius, et ipse novit locum illius.

²⁴Ipse enim fines mundi intuetur et omnia, quae sub caelo sunt, respicit.

²⁵Qui fecit ventis pondus et aquas appendit in mensura,

²⁶quando ponebat pluviis legem et viam procellis sonantibus,

²⁷tunc vidit illam et enarravit et praeparavit et investigavit.

²⁸Et dixit homini: “Ecce timor Domini, ipsa est sapientia; et recedere a malo intellegentia” ”.