Read Nova_Vulgata Iob 30 Bible Online

Iob 30 - Nova_Vulgata bible

Iob 30

¹Nunc autem derident me iuniores tempore, quorum non dignabar patres ponere cum canibus gregis mei;

²quorum virtus manuum mihi erat pro nihilo, et robur iuvenile perierat totum.

³Egestate et fame steriles, qui rodebant in solitudine, serotino tempore fiebant turbo et vastatio;

⁴et mandebant herbas et arborum frutices, et radix iuniperorum erat cibus eorum.

⁵De medio eiciebantur, clamabant contra eos tamquam fures;

⁶ad ripas habitabant torrentium et in cavernis terrae et petrarum;

⁷inter frutices rudebant, sub sentibus se congerebant;

⁸filii stultorum et ignobilium et de terra penitus exturbati.

⁹Nunc in eorum canticum versus sum et factus sum eis in proverbium.

¹⁰Abominantur me et longe fugiunt a me et faciem meam conspuere non verentur.

¹¹Pharetram enim suam aperuit et afflixit me et frenum in os meum immisit.

¹²Ad dexteram progenies surrexerunt; pedes meos subverterunt et complanaverunt contra me semitas ruinae.

¹³Dissipaverunt itinera mea, insidiati sunt mihi et praevaluerunt, et non fuit qui ferret auxilium.

¹⁴Quasi rupto muro et aperto irruerunt super me et sub ruinis devoluti sunt.

¹⁵Versi sunt contra me in terrores, persequitur quasi ventus principatum meum, et velut nubes pertransiit salus mea.

¹⁶Nunc autem in memetipso effunditur anima mea; et possident me dies afflictionis.

¹⁷Nocte os meum perforatur doloribus; et, qui me comedunt, non dormiunt.

¹⁸In multitudine roboris tenent vestimentum meum et quasi capitio tunicae succinxerunt me.

¹⁹Proiecit me in lutum, et assimilatus sum favillae et cineri.

²⁰Clamo ad te, et non exaudis me; sto, et non respicis me.

²¹Mutatus es mihi in crudelem et in duritia manus tuae adversaris mihi.

²²Elevasti me et quasi super ventum ponens dissolvisti me.

²³Scio quia morti trades me, ubi constituta est domus omni viventi.

²⁴Verumtamen non ad ruinam mittit manum; et in exitio eius erit salvatio.

²⁵An non flebam quondam super eo, qui afflictus erat, et compatiebatur anima mea pauperi?

²⁶Exspectabam bona, et venerunt mihi mala; praestolabar lucem, et eruperunt tenebrae.

²⁷Interiora mea efferbuerunt absque ulla requie; praevenerunt me dies afflictionis.

²⁸Taetro vultu incedebam sine consolatione, consurgens in turba clamabam.

²⁹Frater fui draconum et socius struthionum.

³⁰Cutis mea denigrata est super me, et ossa mea aruerunt prae caumate.

³¹Versa est in luctum cithara mea, et organum meum in vocem flentium.