Read Nova_Vulgata Iob 5 Bible Online

Iob 5 - Nova_Vulgata bible

Iob 5

¹Voca ergo, si est qui tibi re spondeat! Ad quem sanctorum converteris?

²Vere stultum interficit iracundia, et fatuum occidit invidia.

³Ego vidi stultum firma radice et maledixi sedi eius statim.

⁴Longe fient filii eius a salute et conterentur in porta, et non erit qui eruat.

⁵Cuius messem famelicus comedet, et ipsum rapiet armatus, et bibent sitientes divitias eius.

⁶Quia non egreditur ex pulvere nequitia, et de humo non oritur dolor.

⁷Sed homo generat laborem, et aves elevant volatum.

⁸Quam ob rem ego deprecabor Dominum et ad Deum ponam eloquium meum,

⁹qui facit magna et inscrutabilia et mirabilia absque numero;

¹⁰qui dat pluviam super faciem terrae et irrigat aquis rura;

¹¹qui ponit humiles in sublime et maerentes erigit sospitate;

¹²qui dissipat cogitationes malignorum, ne possint implere manus eorum, quod coeperant;

¹³qui apprehendit sapientes in astutia eorum et consilium pravorum dissipat.

¹⁴Per diem incurrent tenebras et, quasi in nocte, sic palpabunt in meridie.

¹⁵Porro salvum faciet egenum a gladio oris eorum et de manu violenti pauperem;

¹⁶et erit egeno spes, iniquitas autem contrahet os suum.

¹⁷Beatus homo, qui corripitur a Deo; increpationem ergo Omnipotentis ne reprobes.

¹⁸Quia ipse vulnerat et medetur, percutit, et manus eius sanabunt.

¹⁹In sex tribulationibus liberabit te, et in septem non tanget te malum.

²⁰In fame eruet te de morte et in bello de manu gladii.

²¹A flagello linguae absconderis et non timebis vastationem, cum venerit.

²²In vastitate et fame ridebis et bestias terrae non formidabis.

²³Sed cum lapidibus campi pactum tuum, et bestiae terrae pacificae erunt tibi.

²⁴Et scies quod pacem habeat tabernaculum tuum, et visitans habitationem tuam non falleris.

²⁵Scies quoque quoniam multiplex erit semen tuum, et progenies tua quasi herba terrae.

²⁶Ingredieris in abundantia sepulcrum, sicut infertur acervus tritici in tempore suo.

²⁷Ecce hoc, ut investigavimus, ita est; oboedi illi et tu sapias tibi ”.