Read Nova_Vulgata Iob 9 Bible Online

Iob 9 - Nova_Vulgata bible

Iob 9

¹Et respondens Iob ait:

²“ Vere scio quod ita sit, et quomodo iustificabitur homo compositus Deo?

³Si voluerit contendere cum eo, non poterit ei respondere unum pro mille.

⁴Sapiens corde est et fortis robore; quis restitit ei, et pacem habuit?

⁵Qui transtulit montes, et nescierunt hi, quos subvertit in furore suo.

⁶Qui commovet terram de loco suo, et columnae eius concutiuntur.

⁷Qui praecipit soli, et non oritur, et stellas claudit quasi sub signaculo.

⁸Qui extendit caelos solus et graditur super fluctus maris.

⁹Qui facit Arcturum et Oriona et Hyadas et interiora austri.

¹⁰Qui facit magna et incomprehensibilia et mirabilia, quorum non est numerus.

¹¹Si venerit ad me, non videbo eum; si abierit, non intellegam.

¹²Si repente arripiet, quis eum impediet? Vel quis dicere potest: “Quid facis?”.

¹³Deus non retinet iram suam, et sub eo curvantur auxilia Rahab.

¹⁴Quantus ergo sum ego, ut respondeam ei et loquar delectis verbis cum eo?

¹⁵Quia, etiamsi iustus essem, non responderem, sed meum iudicem deprecarer;

¹⁶et, cum invocantem exaudierit me, non credam quod audierit vocem meam.

¹⁷In turbine enim conteret me et multiplicabit vulnera mea etiam sine causa.

¹⁸Non concedit requiescere spiritum meum et implet me amaritudinibus.

¹⁹Si fortitudo quaeritur, robustissimus est; si iudicium, quis eum arcesserit?

²⁰Si iustificare me voluero, os meum condemnabit me; si innocentem ostendero, pravum me comprobabit.

²¹Etiamsi simplex fuero, hoc ipsum ignorabit anima mea, et contemnam vitam meam.

²²Unum est, quod locutus sum: Et innocentem et impium ipse consumit.

²³Si subito flagellum occidat, de afflictione innocentium ridebit.

²⁴Terra data est in manus impii, vultum iudicum eius operit; quod si non ille est, quis ergo est?

²⁵Dies mei velociores fuerunt cursore: fugerunt et non viderunt bonum;

²⁶pertransierunt quasi naves arundineae, sicut aquila volans ad escam.

²⁷Cum dixero: Obliviscar maerorem meum, commutabo faciem meam et hilaris fiam,

²⁸vereor omnes dolores meos, sciens quod non iustificaveris me.

²⁹Si autem et sic impius sum, quare frustra laboravi?

³⁰Si lotus fuero quasi aquis nivis, et lixivo mundavero manus meas,

³¹tamen sordibus intinges me, et abominabuntur me vestimenta mea.

³²Neque enim viro, qui similis mei est, respondebo; nec vir, quocum in iudicio contendam.

³³Non est qui utrumque valeat arguere et ponere manum suam in ambobus.

³⁴Auferat a me virgam suam, et pavor eius non me terreat.

³⁵Loquar et non timebo eum; quia sic non mecum ipse sum.