Read Nova_Vulgata Psalmi 102 Bible Online

Psalmi 102 - Nova_Vulgata bible

Psalmi 102

¹Preces afflicti, qui defessus angorem suum ante Dominum profundit.

²Domine, exaudi orationem meam, et clamor meus ad te veniat.

³Non abscondas faciem tuam a me; in quacumque die tribulor, inclina ad me aurem tuam. In quacumque die invocavero te, velociter exaudi me.

⁴Quia defecerunt sicut fumus dies mei, et ossa mea sicut cremium aruerunt.

⁵Percussum est ut fenum et aruit cor meum, etenim oblitus sum comedere panem meum.

⁶A voce gemitus mei adhaesit os meum carni meae.

⁷Similis factus sum pellicano solitudinis, factus sum sicut nycticorax in ruinis.

⁸Vigilavi et factus sum sicut passer solitarius in tecto.

⁹Tota die exprobrabant mihi inimici mei, exardescentes in me per me iurabant.

¹⁰Quia cinerem tamquam panem manducabam et potum meum cum fletu miscebam,

¹¹a facie irae et increpationis tuae, quia elevans allisisti me.

¹²Dies mei sicut umbra declinaverunt, et ego sicut fenum arui.

¹³Tu autem, Domine, in aeternum permanes, et memoriale tuum in generationem et generationem.

¹⁴Tu exsurgens misereberis Sion, quia tempus miserendi eius, quia venit tempus,

¹⁵quoniam placuerunt servis tuis lapides eius, et pulveris eius miserentur.

¹⁶Et timebunt gentes nomen tuum, Domine, et omnes reges terrae gloriam tuam,

¹⁷quia aedificavit Dominus Sion et apparuit in gloria sua.

¹⁸Respexit in orationem inopum et non sprevit precem eorum.

¹⁹Scribantur haec pro generatione altera, et populus, qui creabitur, laudabit Dominum.

²⁰Quia prospexit de excelso sanctuario suo, Dominus de caelo in terram aspexit,

²¹ut audiret gemitus compeditorum, ut solveret filios mortis;

²²ut annuntient in Sion nomen Domini et laudem eius in Ierusalem,

²³cum congregati fuerint populi in unum et regna, ut serviant Domino.

²⁴Humiliavit in via virtutem meam, abbreviavit dies meos. Dicam: “ Deus meus,

²⁵ne auferas me in dimidio dierum meorum; in generationem et generationem sunt anni tui.

²⁶Initio terram fundasti; et opera manuum tuarum sunt caeli.

²⁷Ipsi peribunt, tu autem permanes; et omnes sicut vestimentum veterascent, et sicut opertorium mutabis eos, et mutabuntur.

²⁸Tu autem idem ipse es, et anni tui non deficient.

²⁹Filii servorum tuorum habitabunt, et semen eorum in conspectu tuo firmabitur ”.