Read Nova_Vulgata Psalmi 104 Bible Online

Psalmi 104 - Nova_Vulgata bible

Psalmi 104

¹Benedic, anima mea, Domino. Domine Deus meus, magnificatus es vehementer! Maiestatem et decorem induisti,

²amictus lumine sicut vestimento. Extendens caelum sicut velum,

³qui exstruis in aquis cenacula tua. Qui ponis nubem ascensum tuum, qui ambulas super pennas ventorum.

⁴Qui facis angelos tuos spiritus et ministros tuos ignem urentem.

⁵Qui fundasti terram super stabilitatem suam, non inclinabitur in saeculum saeculi.

⁶Abyssus sicut vestimentum operuit eam, super montes stabant aquae.

⁷Ab increpatione tua fugiunt, a voce tonitrui tui formidant.

⁸Ascendunt in montes et descendunt in valles, in locum, quem statuisti eis.

⁹Terminum posuisti, quem non transgredientur, neque convertentur operire terram.

¹⁰Qui emittis fontes in torrentes; inter medium montium pertransibunt,

¹¹potabunt omnes bestias agri, exstinguent onagri sitim suam.

¹²Super ea volucres caeli habitabunt, de medio ramorum dabunt voces.

¹³Rigas montes de cenaculis tuis, de fructu operum tuorum satias terram.

¹⁴Producis fenum iumentis et herbam servituti hominum, educens panem de terra

¹⁵et vinum, quod laetificat cor hominis; exhilarans faciem in oleo, panis autem cor hominis confirmat.

¹⁶Saturabuntur ligna Domini et cedri Libani, quas plantavit.

¹⁷Illic passeres nidificabunt, erodii domus in vertice earum.

¹⁸Montes excelsi cervis, petrae refugium hyracibus.

¹⁹Fecit lunam ad tempora signanda, sol cognovit occasum suum.

²⁰Posuisti tenebras, et facta est nox: in ipsa reptabunt omnes bestiae silvae,

²¹catuli leonum rugientes, ut rapiant et quaerant a Deo escam sibi.

²²Oritur sol, et congregantur et in cubilibus suis recumbunt.

²³Exit homo ad opus suum et ad operationem suam usque ad vesperum.

²⁴Quam multiplicata sunt opera tua, Domine! Omnia in sapientia fecisti, impleta est terra creatura tua.

²⁵Hoc mare magnum et spatiosum et latum: illic reptilia, quorum non est numerus, animalia pusilla cum magnis;

²⁶illic naves pertransibunt, Leviathan, quem formasti ad ludendum cum eo.

²⁷Omnia a te exspectant, ut des illis escam in tempore suo.

²⁸Dante te illis, colligent, aperiente te manum tuam, implebuntur bonis.

²⁹Avertente autem te faciem, turbabuntur; auferes spiritum eorum, et deficient et in pulverem suum revertentur.

³⁰Emittes spiritum tuum, et creabuntur, et renovabis faciem terrae.

³¹Sit gloria Domini in saeculum; laetetur Dominus in operibus suis.

³²Qui respicit terram et facit eam tremere, qui tangit montes, et fumigant.

³³Cantabo Domino in vita mea, psallam Deo meo quamdiu sum.

³⁴Iucundum sit ei eloquium meum, ego vero delectabor in Domino.

³⁵Deficiant peccatores a terra et iniqui, ita ut non sint. Benedic, anima mea, Domino.