Read Nova_Vulgata Psalmi 105 Bible Online

Psalmi 105 - Nova_Vulgata bible

Psalmi 105

¹ALLELUIA. Confitemini Domino et invocate nomen eius, annuntiate inter gentes opera eius.

²Cantate ei et psallite ei, meditamini in omnibus mirabilibus eius.

³Laudamini in nomine sancto eius, laetetur cor quaerentium Dominum.

⁴Quaerite Dominum et potentiam eius, quaerite faciem eius semper.

⁵Mementote mirabilium eius, quae fecit, prodigia eius et iudicia oris eius,

⁶semen Abraham, servi eius, filii Iacob, electi eius.

⁷Ipse Dominus Deus noster; in universa terra iudicia eius.

⁸Memor fuit in saeculum testamenti sui, verbi, quod mandavit in mille generationes,

⁹quod disposuit cum Abraham, et iuramenti sui ad Isaac.

¹⁰Et statuit illud Iacob in praeceptum et Israel in testamentum aeternum

¹¹dicens: “ Tibi dabo terram Chanaan funiculum hereditatis vestrae ”.

¹²Cum essent numero brevi, paucissimi et peregrini in ea,

¹³et pertransirent de gente in gentem et de regno ad populum alterum,

¹⁴non permisit hominem nocere eis et corripuit pro eis reges:

¹⁵“ Nolite tangere christos meos et in prophetis meis nolite malignari ”.

¹⁶Et vocavit famem super terram et omne baculum panis contrivit.

¹⁷Misit ante eos virum, in servum venumdatus est Ioseph.

¹⁸Strinxerunt in compedibus pedes eius, in ferrum intravit collum eius,

¹⁹donec veniret verbum eius, eloquium Domini purgaret eum.

²⁰Misit rex et solvit eum, princeps populorum, et dimisit eum;

²¹constituit eum dominum domus suae et principem omnis possessionis suae,

²²ut erudiret principes eius sicut semetipsum et senes eius prudentiam doceret.

²³Et intravit Israel in Aegyptum, et Iacob peregrinus fuit in terra Cham.

²⁴Et auxit populum suum vehementer et confortavit eum super inimicos eius.

²⁵Convertit cor eorum, ut odirent populum eius et dolum facerent in servos eius.

²⁶Misit Moysen servum suum, Aaron, quem elegit.

²⁷Posuit in eis verba signorum suorum et prodigiorum in terra Cham.

²⁸Misit tenebras et obscuravit, et restiterunt sermonibus eius.

²⁹Convertit aquas eorum in sanguinem et occidit pisces eorum.

³⁰Edidit terra eorum ranas in penetralibus regum ipsorum.

³¹Dixit, et venit coenomyia et scinifes in omnibus finibus eorum.

³²Posuit pluvias eorum grandinem, ignem comburentem in terra ipsorum.

³³Et percussit vineas eorum et ficulneas eorum et contrivit lignum finium eorum.

³⁴Dixit, et venit locusta et bruchus, cuius non erat numerus,

³⁵et comedit omne fenum in terra eorum et comedit fructum terrae eorum.

³⁶Et percussit omne primogenitum in terra eorum, primitias omnis roboris eorum.

³⁷Et eduxit eos cum argento et auro; et non erat in tribubus eorum infirmus.

³⁸Laetata est Aegyptus in profectione eorum, quia incubuit timor eorum super eos.

³⁹Expandit nubem in protectionem et ignem, ut luceret eis per noctem.

⁴⁰Petierunt, et venit coturnix, et pane caeli saturavit eos.

⁴¹Dirupit petram, et fluxerunt aquae, abierunt in sicco flumina.

⁴²Quoniam memor fuit verbi sancti sui ad Abraham puerum suum.

⁴³Et eduxit populum suum in exsultatione, electos suos in laetitia.

⁴⁴Et dedit illis regiones gentium, et labores populorum possederunt,

⁴⁵ut custodiant iustificationes eius et leges eius servent. ALLELUIA.