Read Nova_Vulgata Psalmi 109 Bible Online

Psalmi 109 - Nova_Vulgata bible

Psalmi 109

¹Magistro chori. David. PSALMUS. Deus laudis meae, ne tacueris,

²quia os peccatoris et os dolosi super me apertum est. Locuti sunt adversum me lingua dolosa

³et sermonibus odii circumdederunt me et expugnaverunt me gratis.

⁴Pro dilectione mea adversabantur mihi; ego autem orabam.

⁵Et posuerunt adversum me mala pro bonis et odium pro dilectione mea.

⁶Constitue super eum peccatorem, et adversarius stet a dextris eius.

⁷Cum iudicatur, exeat condemnatus, et oratio eius fiat in peccatum.

⁸Fiant dies eius pauci, et ministerium eius accipiat alter.

⁹Fiant filii eius orphani, et uxor eius vidua.

¹⁰Instabiles vagentur filii eius et mendicent et eiciantur de ruinis suis. -

¹¹Scrutetur fenerator omnem substantiam eius, et diripiant alieni labores eius.

¹²Non sit qui praebeat illi misericordiam, nec sit qui misereatur pupillis eius.

¹³Fiant nati eius in interitum, in generatione una deleatur nomen eorum.

¹⁴In memoriam redeat iniquitas patrum eius in conspectu Domini, et peccatum matris eius non deleatur.

¹⁵Fiant contra Dominum semper, et disperdat de terra memoriam eorum.

¹⁶Pro eo quod non est recordatus facere misericordiam et persecutus est hominem inopem et mendicum et compunctum corde, ut mortificaret.

¹⁷Et dilexit maledictionem: et veniat ei; et noluit benedictionem: et elongetur ab eo.

¹⁸Et induit maledictionem sicut vestimentum: et intret sicut aqua in interiora eius, et sicut oleum in ossa eius.

¹⁹Fiat ei sicut indumentum, quo operitur, et sicut zona, qua semper praecingitur.

²⁰Haec retributio eorum, qui adversantur mihi apud Dominum, et qui loquuntur mala adversus animam meam.

²¹Et tu, Domine, Domine, fac mecum propter nomen tuum, quia suavis est misericordia tua; libera me,

²²quia egenus et pauper ego sum, et cor meum vulneratum est intra me.

²³Sicut umbra, cum declinat, pertransii, excussus sum sicut locustae.

²⁴Genua mea infirmata sunt ieiunio, et caro mea contabuit absque oleo.

²⁵Et ego factus sum opprobrium illis: viderunt me et moverunt capita sua.

²⁶Adiuva me, Domine Deus meus, salvum me fac secundum misericordiam tuam.

²⁷Et sciant quia manus tua haec: tu, Domine, hoc fecisti.

²⁸Maledicant illi, et tu benedicas; qui insurgunt in me, confundantur, servus autem tuus laetabitur.

²⁹Induantur, qui detrahunt mihi, pudore et operiantur sicut diploide confusione sua.

³⁰Confitebor Domino nimis in ore meo et in medio multorum laudabo eum,

³¹quia astitit a dextris pauperis, ut salvam faceret a iudicantibus animam eius.