Read Nova_Vulgata Psalmi 119 Bible Online

Psalmi 119 - Nova_Vulgata bible

Psalmi 119

¹ALLELUIA. ALEPH. Beati immaculati in via, qui ambulant in lege Domini.

²Beati, qui servant testimonia eius, in toto corde exquirunt eum.

³Non enim operati sunt iniquitatem, in viis eius ambulaverunt.

⁴Tu mandasti mandata tua custodiri nimis.

⁵Utinam dirigantur viae meae ad custodiendas iustificationes tuas!

⁶Tunc non confundar, cum perspexero in omnibus praeceptis tuis.

⁷Confitebor tibi in directione cordis, in eo quod didici iudicia iustitiae tuae.

⁸Iustificationes tuas custodiam, non me derelinquas usquequaque.

⁹BETH. In quo mundabit adulescentior viam suam? In custodiendo sermones tuos.

¹⁰In toto corde meo exquisivi te; ne errare me facias a praeceptis tuis.

¹¹In corde meo abscondi eloquia tua, ut non peccem tibi.

¹²Benedictus es, Domine; doce me iustificationes tuas.

¹³In labiis meis numeravi omnia iudicia oris tui.

¹⁴In via testimoniorum tuorum delectatus sum sicut in omnibus divitiis.

¹⁵In mandatis tuis exercebor et considerabo vias tuas.

¹⁶In iustificationibus tuis delectabor, non obliviscar sermonem tuum.

¹⁷GHIMEL. Benefac servo tuo, et vivam et custodiam sermonem tuum.

¹⁸Revela oculos meos, et considerabo mirabilia de lege tua.

¹⁹Incola ego sum in terra, non abscondas a me praecepta tua.

²⁰Defecit anima mea in desiderando iudicia tua in omni tempore.

²¹Increpasti superbos; maledicti, qui errant a praeceptis tuis.

²²Aufer a me opprobrium et contemptum, quia testimonia tua servavi.

²³Etsi principes sedent et adversum me loquuntur, servus tamen tuus exercetur in iustificationibus tuis.

²⁴Nam et testimonia tua delectatio mea, et consilium meum iustificationes tuae.

²⁵DALETH. Adhaesit pulveri anima mea; vivifica me secundum verbum tuum.

²⁶Vias meas enuntiavi, et exaudisti me; doce me iustificationes tuas.

²⁷Viam mandatorum tuorum fac me intellegere, et exercebor in mirabilibus tuis.

²⁸Lacrimata est anima mea prae maerore; erige me secundum verbum tuum.

²⁹Viam mendacii averte a me et legem tuam da mihi benigne.

³⁰Viam veritatis elegi, iudicia tua proposui mihi.

³¹Adhaesi testimoniis tuis, Domine; noli me confundere.

³²Viam mandatorum tuorum curram, quia dilatasti cor meum.

³³HE. Legem pone mihi, Domine, viam iustificationum tuarum, et servabo eam semper.

³⁴Da mihi intellectum, et servabo legem tuam et custodiam illam in toto corde meo.

³⁵Deduc me in semitam praeceptorum tuorum, quia ipsam volui.

³⁶Inclina cor meum in testimonia tua et non in avaritiam.

³⁷Averte oculos meos, ne videant vanitatem; in via tua vivifica me.

³⁸Suscita servo tuo eloquium tuum, quod est ad timorem tuum.

³⁹Amove opprobrium meum, quod suspicatus sum, quia iudicia tua iucunda.

⁴⁰Ecce concupivi mandata tua; in iustitia tua vivifica me.

⁴¹VAU. Et veniat super me misericordia tua, Domine, salutare tuum secundum eloquium tuum.

⁴²Et respondebo exprobrantibus mihi verbum, quia speravi in sermonibus tuis.

⁴³Et ne auferas de ore meo verbum veritatis usquequaque, quia in iudiciis tuis supersperavi.

⁴⁴Et custodiam legem tuam semper, in saeculum et in saeculum saeculi.

⁴⁵Et ambulabo in latitudine, quia mandata tua exquisivi.

⁴⁶Et loquar de testimoniis tuis in conspectu regum et non confundar.

⁴⁷Et delectabor in praeceptis tuis, quae dilexi.

⁴⁸Et levabo manus meas ad praecepta tua, quae dilexi; et exercebor in iustificationibus tuis. -

⁴⁹ZAIN. Memor esto verbi tui servo tuo, in quo mihi spem dedisti.

⁵⁰Hoc me consolatum est in humiliatione mea, quia eloquium tuum vivificavit me.

⁵¹Superbi deriserunt me vehementer; a lege autem tua non declinavi.

⁵²Memor fui iudiciorum tuorum a saeculo, Domine, et consolatus sum.

⁵³Indignatio tenuit me propter peccatores derelinquentes legem tuam.

⁵⁴Cantica factae sunt mihi iustificationes tuae in loco peregrinationis meae.

⁵⁵Memor fui nocte nominis tui, Domine, et custodiam legem tuam.

⁵⁶Hoc factum est mihi, quia mandata tua servavi.

⁵⁷HETH. Portio mea Dominus: dixi custodire verba tua.

⁵⁸Deprecatus sum faciem tuam in toto corde meo; miserere mei secundum eloquium tuum.

⁵⁹Cogitavi vias meas et converti pedes meos in testimonia tua.

⁶⁰Festinavi et non sum moratus, ut custodiam praecepta tua.

⁶¹Funes peccatorum circumplexi sunt me, et legem tuam non sum oblitus.

⁶²Media nocte surgebam ad confitendum tibi super iudicia iustitiae tuae.

⁶³Particeps ego sum omnium timentium te et custodientium mandata tua.

⁶⁴Misericordia tua, Domine, plena est terra; iustificationes tuas doce me.

⁶⁵TETH. Bonitatem fecisti cum servo tuo, Domine, secundum verbum tuum.

⁶⁶Bonitatem et prudentiam et scientiam doce me, quia praeceptis tuis credidi.

⁶⁷Priusquam humiliarer ego erravi; nunc autem eloquium tuum custodiam.

⁶⁸Bonus es tu et benefaciens, doce me iustificationes tuas.

⁶⁹Excogitaverunt contra me dolosa superbi, ego autem in toto corde meo servabo mandata tua.

⁷⁰Incrassatum est sicut adeps cor eorum, ego vero in lege tua delectatus sum.

⁷¹Bonum mihi quia humiliatus sum, ut discam iustificationes tuas.

⁷²Bonum mihi lex oris tui super milia auri et argenti.

⁷³IOD. Manus tuae fecerunt me et plasmaverunt me; da mihi intellectum, et discam praecepta tua.

⁷⁴Qui timent te, videbunt me et laetabuntur, quia in verba tua supersperavi.

⁷⁵Cognovi, Domine, quia aequitas iudicia tua, et in veritate humiliasti me.

⁷⁶Fiat misericordia tua, ut consoletur me, secundum eloquium tuum servo tuo.

⁷⁷Veniant mihi miserationes tuae, et vivam, quia lex tua delectatio mea est.

⁷⁸Confundantur superbi, quoniam dolose incurvaverunt me, ego autem exercebor in mandatis tuis.

⁷⁹Convertantur mihi timentes te, et qui noverunt testimonia tua.

⁸⁰Fiat cor meum immaculatum in iustificationibus tuis, ut non confundar.

⁸¹CAPH. Defecit in salutare tuum anima mea, et in verbum tuum supersperavi.

⁸²Defecerunt oculi mei in eloquium tuum, dicentes: “ Quando consolaberis me? ”.

⁸³Quia factus sum sicut uter in fumo; iustificationes tuas non sum oblitus.

⁸⁴Quot sunt dies servi tui? Quando facies de persequentibus me iudicium?

⁸⁵Foderunt mihi foveas superbi, qui non sunt secundum legem tuam.

⁸⁶Omnia praecepta tua veritas; dolose persecuti sunt me; adiuva me.

⁸⁷Paulo minus consummaverunt me in terra, ego autem non dereliqui mandata tua.

⁸⁸Secundum misericordiam tuam vivifica me, et custodiam testimonia oris tui. -

⁸⁹LAMED. In aeternum, Domine, verbum tuum constitutum est in caelo.

⁹⁰In generationem et generationem veritas tua; firmasti terram, et permanet.

⁹¹Secundum iudicia tua permanent hodie, quoniam omnia serviunt tibi.

⁹²Nisi quod lex tua delectatio mea est, tunc forte periissem in humilia tione mea.

⁹³In aeternum non obliviscar man data tua, quia in ipsis vivificasti me.

⁹⁴Tuus sum ego: salvum me fac, quoniam mandata tua exqui sivi.

⁹⁵Me exspectaverunt peccatores, ut perderent me; testimonia tua intellexi.

⁹⁶Omni consummationi vidi finem, latum praeceptum tuum nimis.

⁹⁷MEM. Quomodo dilexi legem tuam, Domine; tota die meditatio mea est.

⁹⁸Super inimicos meos sapientem me fecit praeceptum tuum, quia in aeternum mihi est.

⁹⁹Super omnes docentes me prudens factus sum, quia testimonia tua meditatio mea est.

¹⁰⁰Super senes intellexi, quia mandata tua servavi.

¹⁰¹Ab omni via mala prohibui pedes meos, ut custodiam verba tua.

¹⁰²A iudiciis tuis non declinavi, quia tu legem posuisti mihi.

¹⁰³Quam dulcia faucibus meis eloquia tua, super mel ori meo.

¹⁰⁴A mandatis tuis intellexi; propterea odivi omnem viam mendacii.

¹⁰⁵NUN. Lucerna pedibus meis verbum tuum et lumen semitis meis.

¹⁰⁶Iuravi et statui custodire iudicia iustitiae tuae.

¹⁰⁷Humiliatus sum usquequaque, Domine; vivifica me secundum verbum tuum.

¹⁰⁸Voluntaria oris mei beneplacita sint, Domine, et iudicia tua doce me.

¹⁰⁹Anima mea in manibus meis semper, et legem tuam non sum oblitus.

¹¹⁰Posuerunt peccatores laqueum mihi, et de mandatis tuis non erravi.

¹¹¹Hereditas mea testimonia tua in aeternum, quia exsultatio cordis mei sunt.

¹¹²Inclinavi cor meum ad faciendas iustificationes tuas in aeternum, in finem.

¹¹³SAMECH. Duplices corde odio habui et legem tuam dilexi.

¹¹⁴Tegmen et scutum meum es tu, et in verbum tuum supersperavi.

¹¹⁵Declinate a me, maligni, et servabo praecepta Dei mei.

¹¹⁶Suscipe me secundum eloquium tuum, et vivam; et non confundas me ab exspectatione mea.

¹¹⁷Sustenta me, et salvus ero et delectabor in iustificationibus tuis semper.

¹¹⁸Sprevisti omnes discedentes a iustificationibus tuis, quia mendacium cogitatio eorum.

¹¹⁹Quasi scoriam delesti omnes peccatores terrae; ideo dilexi testimonia tua.

¹²⁰Horruit a timore tuo caro mea; a iudiciis enim tuis timui.

¹²¹AIN. Feci iudicium et iustitiam; non tradas me calumniantibus me.

¹²²Sponde pro servo tuo in bonum; non calumnientur me superbi.

¹²³Oculi mei defecerunt in desiderio salutaris tui et eloquii iustitiae tuae.

¹²⁴Fac cum servo tuo secundum misericordiam tuam et iustificationes tuas doce me.

¹²⁵Servus tuus sum ego; da mihi intellectum, ut sciam testimonia tua.

¹²⁶Tempus faciendi Domino; dissipaverunt legem tuam.

¹²⁷Ideo dilexi praecepta tua super aurum et obryzum.

¹²⁸Propterea ad omnia mandata tua dirigebar, omnem viam mendacii odio habui. -

¹²⁹PHE. Mirabilia testimonia tua, ideo servavit ea anima mea.

¹³⁰Declaratio sermonum tuorum illuminat et intellectum dat parvulis.

¹³¹Os meum aperui et attraxi spiritum, quia praecepta tua desiderabam.

¹³²Convertere in me et miserere mei secundum iudicium tuum cum diligentibus nomen tuum.

¹³³Gressus meos dirige secundum eloquium tuum, et non dominetur mei omnis iniquitas.

¹³⁴Redime me a calumniis hominum, ut custodiam mandata tua.

¹³⁵Faciem tuam illumina super servum tuum et doce me iustificationes tuas.

¹³⁶Rivulos aquarum deduxerunt oculi mei, quia non custodierunt legem tuam.

¹³⁷SADE. Iustus es, Domine, et rectum iudicium tuum.

¹³⁸Mandasti in iustitia testimonia tua et in veritate nimis.

¹³⁹Consumpsit me zelus meus, quia obliti sunt verba tua inimici mei.

¹⁴⁰Ignitum eloquium tuum vehementer, et servus tuus dilexit illud.

¹⁴¹Adulescentulus sum ego et contemptus; mandata tua non sum oblitus.

¹⁴²Iustitia tua iustitia in aeternum, et lex tua veritas.

¹⁴³Tribulatio et angustia invenerunt me; praecepta tua delectatio mea est.

¹⁴⁴Iustitia testimonia tua in aeternum; intellectum da mihi, et vivam.

¹⁴⁵COPH. Clamavi in toto corde, exaudi me, Domine; iustificationes tuas servabo.

¹⁴⁶Clamavi ad te, salvum me fac, ut custodiam testimonia tua.

¹⁴⁷Praeveni diluculo et clamavi, in verba tua supersperavi.

¹⁴⁸Praevenerunt oculi mei vigilias, ut meditarer eloquia tua.

¹⁴⁹Vocem meam audi secundum misericordiam tuam, Domine, secundum iudicium tuum vivifica me.

¹⁵⁰Appropinquaverunt persequentes me in malitia, a lege autem tua longe facti sunt.

¹⁵¹Prope es tu, Domine, et omnia praecepta tua veritas.

¹⁵²Ab initio cognovi de testimoniis tuis, quia in aeternum fundasti ea.

¹⁵³RES. Vide humiliationem meam et eripe me, quia legem tuam non sum oblitus.

¹⁵⁴Iudica causam meam et redime me; propter eloquium tuum vivifica me.

¹⁵⁵Longe a peccatoribus salus, quia iustificationes tuas non exquisierunt.

¹⁵⁶Misericordiae tuae multae, Domine; secundum iudicia tua vivifica me.

¹⁵⁷Multi, qui persequuntur me et tribulant me; a testimoniis tuis non declinavi.

¹⁵⁸Vidi praevaricantes, et taeduit me, quia eloquia tua non custodierunt.

¹⁵⁹Vide quoniam mandata tua dilexi, Domine; secundum misericordiam tuam vivifica me.

¹⁶⁰Principium verborum tuorum veritas, in aeternum omnia iudicia iustitiae tuae.

¹⁶¹SIN. Principes persecuti sunt me gratis, et a verbis tuis formidavit cor meum.

¹⁶²Laetabor ego super eloquia tua, sicut qui invenit spolia multa.

¹⁶³Mendacium odio habui et abominatus sum; legem autem tuam dilexi.

¹⁶⁴Septies in die laudem dixi tibi super iudicia iustitiae tuae.

¹⁶⁵Pax multa diligentibus legem tuam, et non est illis scandalum.

¹⁶⁶Exspectabam salutare tuum, Domine, et praecepta tua feci.

¹⁶⁷Custodivit anima mea testimonia tua, et dilexi ea vehementer.

¹⁶⁸Servavi mandata tua et testimonia tua, quia omnes viae meae in conspectu tuo.

¹⁶⁹TAU. Appropinquet deprecatio mea in conspectu tuo, Domine; iuxta verbum tuum da mihi intellectum.

¹⁷⁰Intret postulatio mea in conspectu tuo; secundum eloquium tuum libera me.

¹⁷¹Eructabunt labia mea hymnum, cum docueris me iustificationes tuas.

¹⁷²Cantet lingua mea eloquium tuum, quia omnia praecepta tua iustitia.

¹⁷³Fiat manus tua, ut adiuvet me, quoniam mandata tua elegi.

¹⁷⁴Concupivi salutare tuum, Domine, et lex tua delectatio mea est.

¹⁷⁵Vivet anima mea et laudabit te, et iudicia tua adiuvabunt me.

¹⁷⁶Erravi sicut ovis, quae periit; quaere servum tuum, quia praecepta tua non sum oblitus.