Read Nova_Vulgata Psalmi 135 Bible Online

Psalmi 135 - Nova_Vulgata bible

Psalmi 135

¹ALLELUIA. Laudate nomen Domini, laudate, servi Domini,

²qui statis in domo Domini, in atriis domus Dei nostri.

³Laudate Dominum, quia bonus Dominus; psallite nomini eius, quoniam suave.

⁴Quoniam Iacob elegit sibi Dominus, Israel in peculium sibi.

⁵Quia ego cognovi quod magnus est Dominus, et Deus noster prae omnibus diis.

⁶Omnia, quaecumque voluit, Dominus fecit in caelo et in terra, in mari et in omnibus abyssis.

⁷Adducens nubes ab extremo terrae, fulgura in pluviam facit, producit ventos de thesauris suis.

⁸Qui percussit primogenita Aegypti ab homine usque ad pecus.

⁹Misit signa et prodigia in medio tui, Aegypte, in pharaonem et in omnes servos eius.

¹⁰Qui percussit gentes multas et occidit reges fortes:

¹¹Sehon regem Amorraeorum et Og regem Basan et omnia regna Chanaan.

¹²Et dedit terram eorum hereditatem, hereditatem Israel populo suo.

¹³Domine, nomen tuum in aeternum; Domine, memoriale tuum in generationem et generationem.

¹⁴Quia iudicabit Dominus populum suum et servorum suorum miserebitur.

¹⁵Simulacra gentium argentum et aurum, opera manuum hominum.

¹⁶Os habent et non loquentur, oculos habent et non videbunt.

¹⁷Aures habent et non audient; neque enim est spiritus in ore ipsorum.

¹⁸Similes illis erunt, qui faciunt ea, et omnes, qui confidunt in eis.

¹⁹Domus Israel, benedicite Domino; domus Aaron, benedicite Domino;

²⁰domus Levi, benedicite Domino; qui timetis Dominum, benedicite Domino.

²¹Benedictus Dominus ex Sion, qui habitat in Ierusalem. ALLELUIA.