Read Nova_Vulgata Psalmi 136 Bible Online

Psalmi 136 - Nova_Vulgata bible

Psalmi 136

¹ALLELUIA. Confitemini Domino, quoniam bonus, quoniam in aeternum misericordia eius.

²Confitemini Deo deorum, quoniam in aeternum misericordia eius.

³Confitemini Domino dominorum, quoniam in aeternum misericordia eius.

⁴Qui facit mirabilia magna solus, quoniam in aeternum misericordia eius.

⁵Qui fecit caelos in intellectu, quoniam in aeternum misericordia eius.

⁶Qui expandit terram super aquas, quoniam in aeternum misericordia eius.

⁷Qui fecit luminaria magna, quoniam in aeternum misericordia eius:

⁸solem, ut praeesset diei, quoniam in aeternum misericordia eius;

⁹lunam et stellas, ut praeessent nocti, quoniam in aeternum misericordia eius.

¹⁰Qui percussit Aegyptum in primogenitis eorum, quoniam in aeternum misericordia eius.

¹¹Qui eduxit Israel de medio eorum, quoniam in aeternum misericordia eius,

¹²in manu potenti et brachio extento, quoniam in aeternum misericordia eius.

¹³Qui divisit mare Rubrum in divisiones, quoniam in aeternum misericordia eius.

¹⁴Et traduxit Israel per medium eius, quoniam in aeternum misericordia eius.

¹⁵Et excussit pharaonem et virtutem eius in mari Rubro, quoniam in aeternum misericordia eius.

¹⁶Qui traduxit populum suum per desertum, quoniam in aeternum misericordia eius.

¹⁷Qui percussit reges magnos, quoniam in aeternum misericordia eius;

¹⁸et occidit reges potentes, quoniam in aeternum misericordia eius:

¹⁹Sehon regem Amorraeorum, quoniam in aeternum misericordia eius;

²⁰et Og regem Basan, quoniam in aeternum misericordia eius.

²¹Et dedit terram eorum hereditatem, quoniam in aeternum misericordia eius,

²²hereditatem Israel servo suo, quoniam in aeternum misericordia eius.

²³Qui in humilitate nostra memor fuit nostri, quoniam in aeternum misericordia eius;

²⁴et redemit nos ab inimicis nostris, quoniam in aeternum misericordia eius.

²⁵Qui dat escam omni carni, quoniam ìn aeternum misericordia eius.

²⁶Confitemini Deo caeli, quoniam in aeternum misericordia eius.