Read Nova_Vulgata Psalmi 17 Bible Online

Psalmi 17 - Nova_Vulgata bible

Psalmi 17

¹Precatio. David. Exaudi, Domine, iustitiam meam, intende deprecationem meam. Auribus percipe orationem meam, non in labiis dolosis.

²De vultu tuo iudicium meum prodeat; oculi tui videant aequitates.

³Proba cor meum et visita nocte; igne me examina, et non invenies in me iniquitatem.

⁴Non transgreditur os meum ad opera hominum, propter verba labiorum tuorum custodivi me a viis violenti.

⁵Retine gressus meos in semitis tuis, ut non moveantur vestigia mea.

⁶Ego ad te clamavi, quoniam exaudis me, Deus; inclina aurem tuam mihi et exaudi verba mea.

⁷Mirifica misericordias tuas, qui salvos facis ab insurgentibus sperantes in dextera tua.

⁸Custodi me ut pupillam oculi, sub umbra alarum tuarum protege me

⁹a facie impiorum, qui me afflixerunt. Inimici mei in furore circumdederunt me,

¹⁰adipem suum concluserunt; os eorum locutum est superbiam.

¹¹Incedentes nunc circumdederunt me, oculos suos statuerunt prosternere in terram.

¹²Aspectus eorum quasi leonis parati ad praedam et sicut catuli leonis recubantis in abditis.

¹³Exsurge, Domine, praeveni eum, supplanta eum; eripe animam meam ab impio framea tua,

¹⁴a mortuis manu tua, Domine, a mortuis, quorum defecit portio vitae. De reconditis tuis adimpleas ventrem eorum, saturentur filii et dimittant reliquias parvulis suis.

¹⁵Ego autem in iustitia videbo faciem tuam; satiabor, cum evigilavero, conspectu tuo.