Read Nova_Vulgata Psalmi 18 Bible Online

Psalmi 18 - Nova_Vulgata bible

Psalmi 18

¹Magistro chori. David, servi Domini, qui locutus est ad Dominum verba huius cantici, quando Dominus eum liberaverat e potestate omnium inimicorum suorum

²et e manu Saul. Dixit igitur: Diligam te, Domine, fortitudo mea.

³Domine, firmamentum meum et refugium meum et liberator meus; Deus meus, adiutor meus, et sperabo in eum; protector meus et cornu salutis meae et susceptor meus.

⁴Laudabilem invocabo Dominum, et ab inimicis meis salvus ero.

⁵Circumdederunt me fluctus mortis, et torrentes Belial conturbaverunt me;

⁶funes inferni circumdederunt me, praeoccupaverunt me laquei mortis.

⁷In tribulatione mea invocavi Dominum et ad Deum meum clamavi; exaudivit de templo suo vocem meam, et clamor meus in conspectu eius introivit in aures eius.

⁸Commota est et contremuit terra; fundamenta montium concussa sunt et commota sunt, quoniam iratus est.

⁹Ascendit fumus de naribus eius, et ignis de ore eius devorans; carbones succensi processerunt ab eo.

¹⁰Inclinavit caelos et descendit, et caligo sub pedibus eius.

¹¹Et ascendit super cherub et volavit, ferebatur super pennas ventorum.

¹²Et posuit tenebras latibulum suum, in circuitu eius tabernaculum eius, tenebrosa aqua, nubes aeris.

¹³Prae fulgore in conspectu eius nubes transierunt, grando et carbones ignis.

¹⁴Et intonuit de caelo Dominus, et Altissimus dedit vocem suam: grando et carbones ignis.

¹⁵Et misit sagittas suas et dissipavit eos, fulgura iecit et conturbavit eos.

¹⁶Et apparuerunt fontes aquarum, et revelata sunt fundamenta orbis terrarum ab increpatione tua, Domine, ab inspiratione spiritus irae tuae.

¹⁷Misit de summo et accepit me et assumpsit me de aquis multis;

¹⁸eripuit me de inimicis meis fortissimis et ab his, qui oderunt me, quoniam confortati sunt super me.

¹⁹Oppugnaverunt me in die afflictionis meae, et factus est Dominus fulcimentum meum;

²⁰et eduxit me in latitudinem, salvum me fecit, quoniam voluit me.

²¹Et retribuet mihi Dominus secundum iustitiam meam et secundum puritatem manuum mearum reddet mihi,

²²quia custodivi vias Domini nec impie recessi a Deo meo.

²³Quoniam omnia iudicia eius in conspectu meo, et iustitias eius non reppuli a me;

²⁴et fui immaculatus cum eo et observavi me ab iniquitate.

²⁵Et retribuit mihi Dominus secundum iustitiam meam et secundum puritatem manuum mearum in conspectu oculorum eius.

²⁶Cum sancto sanctus eris et cum viro innocente innocens eris

²⁷et cum electo electus eris et cum perverso callidus eris.

²⁸Quoniam tu populum humilem salvum facies et oculos superborum humiliabis.

²⁹Quoniam tu accendis lucernam meam, Domine; Deus meus illuminat tenebras meas.

³⁰Quoniam in te aggrediar hostium turmas et in Deo meo transiliam murum.

³¹Deus, impolluta via eius, eloquia Domini igne examinata; protector est omnium sperantium in se.

³²Quoniam quis Deus praeter Dominum? Aut quae munitio praeter Deum nostrum?

³³Deus, qui praecinxit me virtute et posuit immaculatam viam meam;

³⁴qui perfecit pedes meos tamquam cervorum et super excelsa statuit me;

³⁵qui docet manus meas ad proelium, et tendunt arcum aereum brachia mea.

³⁶Et dedisti mihi scutum salutis tuae, et dextera tua suscepit me, et exauditio tua magnificavit me.

³⁷Dilatasti gressus meos subtus me, et non sunt infirmata vestigia mea.

³⁸Persequebar inimicos meos et comprehendebam illos et non convertebar, donec deficerent.

³⁹Confringebam illos, nec poterant stare, cadebant subtus pedes meos.

⁴⁰Et praecinxisti me virtute ad bellum et supplantasti insurgentes in me subtus me.

⁴¹Et inimicos meos dedisti mihi dorsum et odientes me disperdidisti.

⁴²Clamaverunt, nec erat qui salvos faceret, ad Dominum, nec exaudivit eos.

⁴³Et comminui eos ut pulverem ante faciem venti, ut lutum platearum contrivi eos.

⁴⁴Eripuisti me de contradictionibus populi, constituisti me in caput gentium. Populus, quem non cognovi, servivit mihi,

⁴⁵in auditu auris oboedivit mihi. Filii alieni blanditi sunt mihi,

⁴⁶filii alieni inveterati sunt, contremuerunt in abditis suis.

⁴⁷Vivit Dominus, et benedictus Adiutor meus, et exaltetur Deus salutis meae.

⁴⁸Deus, qui das vindictas mihi et subdis populos sub me, liberator meus de inimicis meis iracundis;

⁴⁹et ab insurgentibus in me exaltas me, a viro iniquo eripis me.

⁵⁰Propterea confitebor tibi in nationibus, Domine, et nomini tuo psalmum dicam,

⁵¹magnificans salutes regis sui et faciens misericordiam christo suo David et semini eius usque in saeculum.