Read Nova_Vulgata Psalmi 34 Bible Online

Psalmi 34 - Nova_Vulgata bible

Psalmi 34

¹David, quando se mente alienatum simulavit coram Abimelech et, ab illo dimissus, abiit.

²ALEPH. Benedicam Dominum in omni tempore, semper laus eius in ore meo.

³BETH. In Domino gloriabitur anima mea, audiant mansueti et laetentur.

⁴GHIMEL. Magnificate Dominum mecum, et exaltemus nomen eius in idipsum.

⁵DALETH. Exquisivi Dominum, et exaudivit me et ex omnibus terroribus meis eripuit me.

⁶HE. Respicite ad eum, et illuminamini, et facies vestrae non confundentur.

⁷ZAIN. Iste pauper clamavit, et Dominus exaudivit eum et de omnibus tribulationibus eius salvavit eum.

⁸HETH. Vallabit angelus Domini in circuitu timentes eum et eripiet eos.

⁹TETH. Gustate et videte quoniam suavis est Dominus; beatus vir, qui sperat in eo.

¹⁰IOD. Timete Dominum, sancti eius, quoniam non est inopia timentibus eum.

¹¹CAPH. Divites eguerunt et esurierunt, inquirentes autem Dominum non deficient omni bono.

¹²LAMED. Venite, filii, audite me: timorem Domini docebo vos.

¹³MEM. Quis est homo, qui vult vitam, diligit dies, ut videat bonum? -

¹⁴NUN. Prohibe linguam tuam a malo, et labia tua, ne loquantur dolum.

¹⁵SAMECH. Diverte a malo et fac bonum, inquire pacem et persequere eam.

¹⁶AIN. Oculi Domini super iustos, et aures eius in clamorem eorum.

¹⁷PHE. Vultus autem Domini super facientes mala, ut perdat de terra memoriam eorum.

¹⁸SADE. Clamaverunt, et Dominus exaudivit et ex omnibus tribulationibus eorum liberavit eos.

¹⁹COPH. Iuxta est Dominus iis, qui contrito sunt corde, et confractos spiritu salvabit.

²⁰RES. Multae tribulationes iustorum, et de omnibus his liberabit eos Dominus.

²¹SIN. Custodit omnia ossa eorum, unum ex his non conteretur.

²²TAU. Interficiet peccatorem malitia; et, qui oderunt iustum, punientur.

²³PHE. Redimet Dominus animas servorum suorum; et non punientur omnes, qui sperant in eo.