Read Nova_Vulgata Psalmi 50 Bible Online

Psalmi 50 - Nova_Vulgata bible

Psalmi 50

¹PSALMUS. Asaph. Deus deorum, Dominus, locutus est et vocavit terram a solis ortu usque ad occasum.

²Ex Sion speciosa decore Deus illuxit,

³Deus noster veniet et non silebit: ignis consumens est in conspectu eius, et in circuitu eius tempestas valida.

⁴Advocabit caelum desursum et terram discernere populum suum:

⁵“ Congregate mihi sanctos meos, qui disposuerunt testamentum meum in sacrificio ”.

⁶Et annuntiabunt caeli iustitiam eius, quoniam Deus iudex est.

⁷“ Audi, populus meus, et loquar, Israel, et testificabor adversum te: Deus, Deus tuus, ego sum.

⁸Non in sacrificiis tuis arguam te; holocausta enim tua in conspectu meo sunt semper.

⁹Non accipiam de domo tua vitulos neque de gregibus tuis hircos.

¹⁰Quoniam meae sunt omnes ferae silvarum, iumentorum mille in montibus.

¹¹Cognovi omnia volatilia caeli; et, quod movetur in agro, meum est.

¹²Si esuriero non dicam tibi; meus est enim orbis terrae et plenitudo eius.

¹³Numquid manducabo carnes taurorum aut sanguinem hircorum potabo?

¹⁴Immola Deo sacrificium laudis et redde Altissimo vota tua;

¹⁵et invoca me in die tribulationis: eruam te, et honorificabis me ”.

¹⁶Peccatori autem dixit Deus: “ Quare tu enarras praecepta mea et assumis testamentum meum in os tuum?

¹⁷Tu vero odisti disciplinam et proiecisti sermones meos retrorsum.

¹⁸Si videbas furem, currebas cum eo; et cum adulteris erat portio tua.

¹⁹Os tuum dimittebas ad malitiam, et lingua tua concinnabat dolos.

²⁰Sedens adversus fratrem tuum loquebaris et adversus filium matris tuae proferebas opprobrium.

²¹Haec fecisti, et tacui. Existimasti quod eram tui similis. Arguam te et statuam illa contra faciem tuam.

²²Intellegite haec, qui obliviscimini Deum, ne quando rapiam, et non sit qui eripiat.

²³Qui immolabit sacrificium laudis, honorificabit me; et, qui immaculatus est in via, ostendam illi salutare Dei ”.