Read Nova_Vulgata Psalmi 60 Bible Online

Psalmi 60 - Nova_Vulgata bible

Psalmi 60

¹Magistro chori. Secundum " Lilium praecepti ". Miktam. David. Ad docendum.

²Quando contra Aram Naharaim et Aram Soba egressus est, et quando Ioab reversus devicit Edom in valle Salis: duodecim milia (hominum).

³Deus, reppulisti nos, destruxisti nos. Iratus es. Convertere ad nos!

⁴Concussisti terram, confregisti eam; sana contritiones eius, quia commota est.

⁵Ostendisti populo tuo dura, potasti nos vino vertiginis.

⁶Dedisti metuentibus te signum, ut fugiant a facie arcus.

⁷Ut liberentur dilecti tui, salvos fac dextera tua et exaudi nos.

⁸Deus locutus est in sancto suo: “ Laetabor et partibor Sichimam et convallem Succoth metibor.

⁹Meus est Galaad, et meus est Manasses, et Ephraim fortitudo capitis mei. Iuda sceptrum meum,

¹⁰Moab olla lavacri mei. Super Idumaeam extendam calceamentum meum, super Philistaeam vociferabor ”.

¹¹Quis adducet me in civitatem munitam? Quis deducet me usque in Idumaeam?

¹²Nonne tu, Deus, qui reppulisti nos; et non egredieris, Deus, in virtutibus nostris? Da nobis auxilium de tribulatione, quia vana salus hominis.

¹³In Deo faciemus virtutem, et ipse conculcabit tribulantes nos.