Read Nova_Vulgata Psalmi 69 Bible Online

Psalmi 69 - Nova_Vulgata bible

Psalmi 69

¹Magistro chori. Secundum " Lilia... ". David.

²Salvum me fac, Deus, quoniam venerunt aquae usque ad guttur meum.

³Infixus sum in limo profundi, et non est substantia; veni in profunda aquarum, et fluctus demersit me.

⁴Laboravi clamans, raucae factae sunt fauces meae; defecerunt oculi mei, dum spero in Deum meum.

⁵Multiplicati sunt super capillos capitis mei, qui oderunt me gratis. Confortati sunt, qui persecuti sunt me inimici mei mendaces; quae non rapui, tunc exsolvebam.

⁶Deus, tu scis insipientiam meam, et delicta mea a te non sunt abscondita.

⁷Non erubescant in me, qui exspectant te, Domine, Domine virtutum. Non confundantur super me, qui quaerunt te, Deus Israel.

⁸Quoniam propter te sustinui opprobrium, operuit confusio faciem meam;

⁹extraneus factus sum fratribus meis et peregrinus filiis matris meae.

¹⁰Quoniam zelus domus tuae comedit me, et opprobria exprobrantium tibi ceciderunt super me.

¹¹Et flevi in ieiunio animam meam, et factum est in opprobrium mihi.

¹²Et posui vestimentum meum cilicium, et factus sum illis in parabolam.

¹³Adversum me loquebantur, qui sedebant in porta, et in me canebant, qui bibebant vinum.

¹⁴Ego vero orationem meam ad te, Domine, in tempore beneplaciti, Deus. In multitudine misericordiae tuae exaudi me, in veritate salutis tuae.

¹⁵Eripe me de luto, ut non infigar, eripiar ab iis, qui oderunt me, et de profundis aquarum.

¹⁶Non me demergat fluctus aquarum, neque absorbeat me profundum, neque urgeat super me puteus os suum.

¹⁷Exaudi me, Domine, quoniam benigna est misericordia tua; secundum multitudinem miserationum tuarum respice in me.

¹⁸Et ne avertas faciem tuam a puero tuo; quoniam tribulor, velociter exaudi me.

¹⁹Accede ad animam meam, vindica eam, propter inimicos meos redime me.

²⁰Tu scis opprobrium meum et confusionem meam et reverentiam meam. - In conspectu tuo sunt omnes, qui tribulant me;

²¹opprobrium contrivit cor meum, et elangui. Et sustinui, qui simul contristaretur, et non fuit, et qui consolaretur, et non inveni.

²²Et dederunt in escam meam fel et in siti mea potaverunt me aceto.

²³Fiat mensa eorum coram ipsis in laqueum et in retributiones et in scandalum.

²⁴Obscurentur oculi eorum, ne videant, et lumbos eorum semper infirma.

²⁵Effunde super eos iram tuam, et furor irae tuae comprehendat eos.

²⁶Fiat commoratio eorum deserta, et in tabernaculis eorum non sit qui inhabitet.

²⁷Quoniam, quem tu percussisti, persecuti sunt, et super dolorem eius, quem vulnerasti, addiderunt.

²⁸Appone iniquitatem super iniquitatem eorum, et non veniant ad iustitiam tuam.

²⁹Deleantur de libro viventium et cum iustis non scribantur.

³⁰Ego autem sum pauper et dolens; salus tua, Deus, suscipit me.

³¹Laudabo nomen Dei cum cantico et magnificabo eum in laude.

³²Et placebit Domino super taurum, super vitulum cornua producentem et ungulas.

³³Videant humiles et laetentur; quaerite Deum, et vivet cor vestrum,

³⁴quoniam exaudivit pauperes Dominus et vinctos suos non despexit.

³⁵Laudent illum caeli et terra, maria et omnia reptilia in eis.

³⁶Quoniam Deus salvam faciet Sion et aedificabit civitates Iudae; et inhabitabunt ibi et possidebunt eam.

³⁷Et semen servorum eius hereditabunt eam; et, qui diligunt nomen eius, habitabunt in ea.