Read Nova_Vulgata Psalmi 72 Bible Online

Psalmi 72 - Nova_Vulgata bible

Psalmi 72

¹Salomonis. Deus, iudicium tuum regi da et iustitiam tuam filio regis;

²iudicet populum tuum in iustitia et pauperes tuos in iudicio.

³Afferant montes pacem populo, et colles iustitiam.

⁴Iudicabit pauperes populi et salvos faciet filios inopis et humiliabit calumniatorem.

⁵Et permanebit cum sole et ante lunam in generatione et generationem.

⁶Descendet sicut pluvia in gramen, et sicut imber irrigans terram.

⁷Florebit in diebus eius iustitia et abundantia pacis, donec auferatur luna.

⁸Et dominabitur a mari usque ad mare et a flumine usque ad terminos orbis terrarum.

⁹Coram illo procident incolae deserti, et inimici eius terram lingent.

¹⁰Reges Tharsis et insulae munera offerent, reges Arabum et Saba dona adducent.

¹¹Et adorabunt eum omnes reges, omnes gentes servient ei.

¹²Quia liberabit inopem clamantem et pauperem, cui non erat adiutor.

¹³Parcet pauperi et inopi et animas pauperum salvas faciet.

¹⁴Ex oppressione et violentia redimet animas eorum, et pretiosus erit sanguis eorum coram illo. -

¹⁵Et vivet, et dabitur ei de auro Arabiae, et orabunt pro ipso semper; tota die benedicent ei.

¹⁶Et erit ubertas frumenti in terra, in summis montium fluctuabit, sicut Libanus fructus eius; et florebunt de civitate sicut fenum terrae.

¹⁷Sit nomen eius benedictum in saecula, ante solem permanebit nomen eius. Et benedicentur in ipso omnes tribus terrae, omnes gentes magnificabunt eum.

¹⁸Benedictus Dominus Deus, Deus Israel, qui facit mirabilia solus.

¹⁹Et benedictum nomen maiestatis eius in aeternum; et replebitur maiestate eius omnis terra. Fiat, fiat.