Read Nova_Vulgata Psalmi 83 Bible Online

Psalmi 83 - Nova_Vulgata bible

Psalmi 83

¹Canticum. PSALMUS. Asaph.

²Deus, ne quiescas, ne taceas neque compescaris, Deus,

³quoniam ecce inimici tui fremuerunt, et, qui oderunt te, extulerunt caput.

⁴Adversus populum tuum malignaverunt consilium et cogitaverunt adversus eos, quos abscondisti tibi.

⁵Dixerunt: “ Venite, et disperdamus eos de gente, et non memoretur nomen Israel ultra! ”.

⁶Quoniam cogitaverunt unanimiter, adversum te testamentum statuerunt:

⁷tabernacula Idumaeorum et Ismaelitae, Moab et Agareni,

⁸Gebal et Ammon et Amalec, Philistaea cum habitantibus Tyrum.

⁹Etenim Assur sociabatur cum illis; facti sunt in adiutorium filiis Lot.

¹⁰Fac illis sicut Madian et Sisarae, sicut Iabin in torrente Cison.

¹¹Disperierunt in Endor, facti sunt ut stercus super terram.

¹²Pone duces eorum sicut Oreb et Zeb et Zebee et Salmana, omnes principes eorum,

¹³qui dixerunt: “ Hereditate possideamus pascua Dei! ”.

¹⁴Deus meus, pone illos ut rotam et sicut stipulam ante ventum.

¹⁵Sicut ignis, qui comburit silvam, et sicut flamma devorans montes,

¹⁶ita persequeris illos in tempestate tua et in procella tua turbabis eos.

¹⁷Imple facies eorum ignominia, et quaerent nomen tuum, Domine.

¹⁸Erubescant et conturbentur in saeculum saeculi et confundantur et pereant;

¹⁹et cognoscant quia nomen tibi Dominus: tu solus Altissimus super omnem terram.