Read Nova_Vulgata Psalmi 84 Bible Online

Psalmi 84 - Nova_Vulgata bible

Psalmi 84

¹Magistro chori. Secundum " Torcularia ". Filiorum Core. PSALMUS.

²Quam dilecta tabernacula tua, Domine virtutum!

³Concupiscit et deficit anima mea in atria Domini. Cor meum et caro mea exsultaverunt in Deum vivum.

⁴Etenim passer invenit sibi domum, et turtur nidum sibi, ubi ponat pullos suos: altaria tua, Domine virtutum, rex meus et Deus meus.

⁵Beati, qui habitant in domo tua: in perpetuum laudabunt te.

⁶Beatus vir, cuius est auxilium abs te, ascensiones in corde suo disposuit.

⁷Transeuntes per vallem sitientem in fontem ponent eam, etenim benedictionibus vestiet eam pluvia matutina.

⁸Ibunt de virtute in virtutem, videbitur Deus deorum in Sion.

⁹Domine, Deus virtutum, exaudi orationem meam; auribus percipe, Deus Iacob.

¹⁰Protector noster aspice, Deus, et respice in faciem christi tui.

¹¹Quia melior est dies una in atriis tuis super milia, elegi ad limen esse in domo Dei mei magis quam habitare in tabernaculis peccatorum.

¹²Quia sol et scutum est Dominus Deus, gratiam et gloriam dabit Dominus; non privabit bonis eos, qui ambulant in innocentia.

¹³Domine virtutum, beatus homo, qui sperat in te.