Read Nova_Vulgata Psalmi 85 Bible Online

Psalmi 85 - Nova_Vulgata bible

Psalmi 85

¹Magistro chori. Filiorum Core. PSALMUS.

²Complacuisti tibi, Domine, in terra tua, convertisti captivitatem Iacob.

³Remisisti iniquitatem plebis tuae, operuisti omnia peccata eorum.

⁴Contraxisti omnem iram tuam, revertisti a furore indignationis tuae.

⁵Converte nos, Deus, salutaris noster, et averte iram tuam a nobis.

⁶Numquid in aeternum irasceris nobis aut extendes iram tuam a generatione in generationem?

⁷Nonne tu conversus vivificabis nos, et plebs tua laetabitur in te?

⁸Ostende nobis, Domine, misericordiam tuam et salutare tuum da nobis.

⁹Audiam, quid loquatur Dominus Deus, quoniam loquetur pacem ad plebem suam et sanctos suos et ad eos, qui convertuntur corde.

¹⁰Vere prope timentes eum salutare ipsius, ut inhabitet gloria in terra nostra.

¹¹Misericordia et veritas obviaverunt sibi, iustitia et pax osculatae sunt.

¹²Veritas de terra orta est, et iustitia de caelo prospexit.

¹³Etenim Dominus dabit benignitatem, et terra nostra dabit fructum suum.

¹⁴Iustitia ante eum ambulabit et ponet in via gressus suos.