Read Nova_Vulgata Psalmi 94 Bible Online

Psalmi 94 - Nova_Vulgata bible

Psalmi 94

¹Deus ultionum, Domine, Deus ultionum, effulge.

²Exaltare, qui iudicas terram, redde retributionem superbis.

³Usquequo peccatores, Domine, usquequo peccatores exsultabunt?

⁴Effabuntur et loquentur proterva, gloriabuntur omnes, qui operantur iniquitatem. -

⁵Populum tuum, Domine, humiliant et hereditatem tuam vexant.

⁶Viduam et advenam interficiunt et pupillos occidunt.

⁷Et dixerunt: “ Non videbit Dominus, nec intelleget Deus Iacob ”.

⁸Intellegite, insipientes in populo; et stulti, quando sapietis?

⁹Qui plantavit aurem, non audiet, aut qui finxit oculum, non respiciet?

¹⁰Qui corripit gentes, non arguet, qui docet hominem scientiam?

¹¹Dominus scit cogitationes hominum, quoniam vanae sunt.

¹²Beatus homo, quem tu erudieris, Domine, et de lege tua docueris eum,

¹³ut mitiges ei a diebus malis, donec fodiatur peccatori fovea.

¹⁴Quia non repellet Dominus plebem suam et hereditatem suam non derelinquet.

¹⁵Quia ad iustitiam revertetur iudicium, et sequentur illam omnes, qui recto sunt corde.

¹⁶Quis consurget mihi adversus malignantes, aut quis stabit mecum adversus operantes iniquitatem?

¹⁷Nisi quia Dominus adiuvit me, paulo minus habitasset in loco silentii anima mea.

¹⁸Si dicebam: “ Motus est pes meus ”, misericordia tua, Domine, sustentabat me.

¹⁹In multitudine sollicitudinum mearum in corde meo, consolationes tuae laetificaverunt animam meam.

²⁰Numquid sociabitur tibi sedes iniquitatis, quae fingit molestiam contra praeceptum?

²¹Irruunt in animam iusti et sanguinem innocentem condemnant.

²²Et factus est mihi Dominus in praesidium, et Deus meus in rupem refugii mei;

²³et reddet illis iniquitatem ipsorum et in malitia eorum disperdet eos,

²⁴disperdet illos Dominus Deus noster.