Read Nova_Vulgata Proverbia 10 Bible Online

Proverbia 10 - Nova_Vulgata bible

Proverbia 10

¹Parabolae Salomonis. Filius sapiens laetificat pa trem, filius vero stultus maestitia est matris suae.

²Nil proderunt thesauri impietatis, iustitia vero liberabit a morte.

³Non affliget Dominus fame animam iusti et cupiditatem impiorum subvertet.

⁴Egestatem operata est manus remissa, manus autem fortium divitias parat.

⁵Qui congregat in messe, filius sapiens est; qui autem stertit aestate, filius confusionis.

⁶Benedictiones Domini super caput iusti, os autem impiorum operit violentiam.

⁷Memoria iusti in benedictione erit, et nomen impiorum putrescet.

⁸Sapiens corde praecepta suscipit, et stultus labiis corruet.

⁹Qui ambulat simpliciter, ambulat confidenter; qui autem depravat vias suas, manifestus erit.

¹⁰Qui annuit oculo, dabit dolorem, et stultus labiis corruet.

¹¹Vena vitae os iusti, et os impiorum operit violentiam.

¹²Odium suscitat rixas, et universa delicta operit caritas.

¹³In labiis sapientis invenitur sapientia, et virga in dorso eius, qui indiget corde.

¹⁴Sapientes recondunt scientiam, os autem stulti ruinae proximum est.

¹⁵Substantia divitis urbs fortitudinis eius, ruina pauperum egestas eorum.

¹⁶Opus iusti ad vitam, fructus autem impii ad peccatum.

¹⁷Graditur ad vitam, qui custodit disciplinam; qui autem increpationes relinquit, errat.

¹⁸Abscondunt odium labia mendacia; qui profert contumeliam, insipiens est.

¹⁹In multiloquio non deerit peccatum; qui autem moderatur labia sua, prudentissimus est.

²⁰Argentum electum lingua iusti, cor autem impiorum pro nihilo.

²¹Labia iusti erudiunt plurimos; qui autem indocti sunt, in cordis egestate morientur.

²²Benedictio Domini divites facit, nec addet ei labor quidquam.

²³Quasi per risum stultus operatur scelus, sapientia autem est viro prudentiae.

²⁴Quod timet impius, veniet super eum; desiderium suum iustis dabitur.

²⁵Quasi tempestas transiens non erit impius, iustus autem quasi fundamentum sempiternum.

²⁶Sicut acetum dentibus et fumus oculis, sic piger his, qui miserunt eum.

²⁷Timor Domini apponet dies, et anni impiorum breviabuntur.

²⁸Exspectatio iustorum laetitia, spes autem impiorum peribit.

²⁹Fortitudo simplici via Domini et ruina his, qui operantur malum.

³⁰Iustus in aeternum non commovebitur, impii autem non habitabunt super terram.

³¹Os iusti germinabit sapientiam, lingua prava abscindetur.

³²Labia iusti considerant placita, et os impiorum perversa.