Read Nova_Vulgata Proverbia 11 Bible Online

Proverbia 11 - Nova_Vulgata bible

Proverbia 11

¹Statera dolosa abominatio est apud Dominum, et pondus aequum voluntas eius.

²Venit superbia, veniet et contumelia; apud humiles autem sapientia.

³Simplicitas iustorum diriget eos, et supplantatio perversorum vastabit illos.

⁴Non proderunt divitiae in die ultionis, iustitia autem liberabit a morte.

⁵Iustitia simplicis diriget viam eius, et in impietate sua corruet impius.

⁶Iustitia rectorum liberabit eos, et in insidiis suis capientur iniqui.

⁷Mortuo homine impio, nulla erit ultra spes; et exspectatio divitiarum peribit.

⁸Iustus de angustia liberatus est, et tradetur impius pro eo.

⁹Simulator ore decipit amicum suum, iusti autem liberabuntur scientia.

¹⁰In bonis iustorum exsultabit civitas, et in perditione impiorum erit laudatio.

¹¹Benedictione iustorum exaltabitur civitas et ore impiorum subvertetur.

¹²Qui despicit amicum suum, indigens corde est, vir autem prudens tacebit.

¹³Qui ambulat susurrans, revelat arcana; qui autem fidelis est animi, celat commissum.

¹⁴Ubi non adsunt dispositiones, populus corruet; salus autem, ubi multa consilia.

¹⁵Affligetur malo, qui fidem facit pro extraneo; qui autem odit sponsores, securus erit.

¹⁶Mulier gratiosa inveniet gloriam, et robusti habebunt divitias.

¹⁷Benefacit animae suae vir misericors; qui autem crudelis est, carnem suam affligit.

¹⁸Impius facit opus fallax, seminanti autem iustitiam merces fidelis.

¹⁹Firmus in iustitia praeparat vitam, et sectator malorum mortem.

²⁰Abominabile Domino cor pravum, et voluntas eius in iis, qui simpliciter ambulant.

²¹Manus in manu, non erit impunitus malus, semen autem iustorum salvabitur.

²²Circulus aureus in naribus suis mulier pulchra et fatua.

²³Desiderium iustorum omne bonum est, praestolatio impiorum furor.

²⁴Alii dividunt propria et ditiores fiunt, alii parciores iusto semper in egestate sunt.

²⁵Anima, quae benedicit, impinguabitur; et, qui inebriat, ipse quoque inebriatur.

²⁶Qui abscondit frumenta, maledicetur in populis, benedictio autem super caput vendentium.

²⁷Qui instanter quaerit bonum, quaerit beneplacitum; qui autem investigator malorum est, haec advenient ei.

²⁸Qui confidit in divitiis suis, corruet, iusti autem quasi virens folium germinabunt.

²⁹Qui conturbat domum suam, possidebit ventos; et, qui stultus est, serviet sapienti.

³⁰Fructus iusti lignum vitae; et suscipit animas, qui sapiens est.

³¹Si iustus in terra rependitur, quanto magis impius et peccator.