Read Nova_Vulgata Proverbia 12 Bible Online

Proverbia 12 - Nova_Vulgata bible

Proverbia 12

¹Qui diligit disciplinam, diligit scientiam; qui autem odit increpationes, insipiens est.

²Qui bonus est, hauriet gratiam a Domino, virum autem versutum ipse condemnabit.

³Non roborabitur homo ex impietate, et radix iustorum non commovebitur.

⁴Mulier diligens corona est viro suo, et quasi putredo in ossibus eius, quae est inhonesta.

⁵Cogitationes iustorum iudicia, et consilia impiorum fraudulentia.

⁶Verba impiorum insidiantur sanguini, os iustorum liberabit eos.

⁷Subvertuntur impii et iam non sunt, domus autem iustorum permanebit.

⁸Ad doctrinam suam laudabitur vir; qui autem perversus corde est, patebit contemptui.

⁹Melior est pauper, qui ministrat sibi, quam gloriosus et indigens pane.

¹⁰Curat iustus iumentorum suorum animas, viscera autem impiorum crudelia.

¹¹Qui operatur terram suam, satiabitur panibus; qui autem sectatur vana, vecors est.

¹²Desiderat impius laqueum pessimorum, radix autem iustorum proficiet.

¹³Propter peccata labiorum irretitur malus, effugiet autem iustus de angustia.

¹⁴De fructu oris sui unusquisque replebitur bonis, et iuxta opera manuum suarum retribuetur ei.

¹⁵Via stulti recta in oculis eius; qui autem sapiens est, audit consilia.

¹⁶Fatuus statim indicat iram suam, dissimulat autem iniuriam callidus.

¹⁷Qui spirat veritatem, index iustitiae est, testis autem mendax, fraudulentiae.

¹⁸Est qui temere loquitur et quasi gladio pungit, lingua autem sapientium sanitas est.

¹⁹Labium veritatis firmum erit in perpetuum, ad momentum autem lingua mendacii.

²⁰Dolus in corde cogitantium mala; qui autem pacis ineunt consilia, sequitur eos gaudium.

²¹Nulla calamitas obveniet iusto, impii autem replebuntur malo.

²²Abominatio est Domino labia mendacia, qui autem fideliter agunt, placent ei.

²³Homo versutus celat scientiam, et cor insipientium provocat stultitiam.

²⁴Manus fortium dominabitur, quae autem remissa est, tributis serviet.

²⁵Maeror in corde viri humiliabit illum, et sermo bonus laetificabit eum.

²⁶In rectum ducit amicum iustus, iter autem impiorum decipiet eos.

²⁷Non assabit ignavia praedam suam, sed substantia pretiosa erit viro industrio.

²⁸In semita iustitiae vita, est autem etiam iter apertum ad mortem.