Read Nova_Vulgata Proverbia 13 Bible Online

Proverbia 13 - Nova_Vulgata bible

Proverbia 13

¹Filius sapiens disciplina patris; qui autem illusor est, non audit, cum arguitur.

²De fructu oris sui homo satiabitur bonis, anima autem praevaricatorum violentia.

³Qui custodit os suum, custodit animam suam; qui autem incautus est eloquio, ruina est ei.

⁴Vult et non habet piger, anima autem operantium impinguabitur.

⁵Verbum mendax iustus detestabitur, impius autem confundit et dehonestat.

⁶Iustitia custodit innocentem in via, impietas autem peccatorem supplantat.

⁷Est qui quasi dives habetur, cum nihil habeat; et est qui quasi pauper, cum in multis divitiis sit.

⁸Redemptio animae viri divitiae suae; qui autem pauper est, increpationem non sustinet.

⁹Lux iustorum laetificat, lucerna autem impiorum exstinguetur.

¹⁰Inter superbos tantum iurgia sunt, et apud humiles sapientia.

¹¹Substantia festinata minuetur; qui autem colligit manu, multiplicat.

¹²Spes, quae differtur, affligit animam, lignum vitae desiderium veniens.

¹³Qui contemnit verbum, ipse se obligat; qui autem timet praeceptum, retribuetur ei.

¹⁴Lex sapientis fons vitae, ut declinet a laqueis mortis.

¹⁵Intellegentia bona dabit gratiam, in itinere infidelium vorago.

¹⁶Omnis astutus agit cum consilio; qui autem fatuus est, aperit stultitiam.

¹⁷Nuntius impius cadet in malum, legatus autem fidelis sanitas.

¹⁸Egestas et ignominia ei, qui deserit disciplinam; qui autem acquiescit arguenti, glorificabitur.

¹⁹Desiderium, si compleatur, delectat animam; detestantur stulti fugere mala.

²⁰Qui cum sapientibus graditur, sapiens erit; amicus stultorum malus efficietur.

²¹Peccatores persequitur malum, et iustis retribuentur bona.

²²Bonus relinquit heredes filios et nepotes; et custoditur iusto substantia peccatoris.

²³Multi cibi in novalibus pauperum, et est qui perit, deficiente iudicio.

²⁴Qui parcit virgae, odit filium suum; qui autem diligit illum, instanter erudit.

²⁵Iustus comedit et replet animam suam, venter autem impiorum insaturabilis.