Read Nova_Vulgata Proverbia 16 Bible Online

Proverbia 16 - Nova_Vulgata bible

Proverbia 16

¹Hominis est animum praeparare, et Domini est responsio linguae.

²Omnes viae hominis purae sunt oculis eius, spirituum ponderator est Dominus.

³Revela Domino opera tua, et dirigentur cogitationes tuae.

⁴Universa secundum proprium finem operatus est Dominus; impium quoque ad diem malum.

⁵Abominatio Domini est omnis arrogans; manus in manu, non erit innocens.

⁶Misericordia et veritate redimitur iniquitas, et in timore Domini declinatur a malo.

⁷Cum placuerint Domino viae hominis, inimicos quoque eius convertet ad pacem.

⁸Melius est parum cum iustitia quam multi fructus sine aequitate.

⁹Cor hominis disponit viam suam, sed Domini est dirigere gressus eius.

¹⁰Divinatio in labiis regis, in iudicio non errabit os eius.

¹¹Pondus et statera iusta Domini sunt, et opera eius omnes lapides sacculi.

¹²Abominantur reges agere impie, quoniam iustitia firmatur solium.

¹³Voluntas regum labia iusta; qui recta loquitur, diligetur.

¹⁴Indignatio regis nuntii mortis, et vir sapiens placabit eam.

¹⁵In lumine vultus regis vita, et voluntas eius quasi imber serotinus.

¹⁶Possidere sapientiam quanto melius est auro; et acquirere prudentiam pretiosius est argento.

¹⁷Semita iustorum declinare a malo; custos animae suae, qui servat viam suam.

¹⁸Contritionem praecedit superbia, et ante ruinam exaltatio spiritus.

¹⁹Melius est humiliari cum mitibus quam dividere spolia cum superbis.

²⁰Eruditus in verbo reperiet bona; et, qui sperat in Domino, beatus est.

²¹Qui sapiens est corde, appellabitur prudens; et dulcedo labiorum addet doctrinam.

²²Fons vitae eruditio possidentis; poena stultorum stultitia.

²³Cor sapientis erudiet os eius et labiis eius addet doctrinam.

²⁴Favus mellis composita verba, dulcedo animae et sanitas ossium.

²⁵Est via, quae videtur homini recta, et novissima eius ducunt ad mortem.

²⁶Anima laborantis laborat sibi, quia compulit eum os suum.

²⁷Vir impius fodit malum, et in labiis eius quasi ignis ardens.

²⁸Homo perversus suscitat lites, et mussitator separat familiares.

²⁹Vir iniquus lactat amicum suum et ducit eum per viam non bonam.

³⁰Qui attonitis oculis cogitat prava, comprimens labia sua perficit malum.

³¹Corona dignitatis canities, quae in viis iustitiae reperietur.

³²Melior est patiens viro forti, et, qui dominatur animo suo, expugnatore urbium.

³³Sortes mittuntur in sinum, sed a Domino temperantur.