Read Nova_Vulgata Proverbia 25 Bible Online

Proverbia 25 - Nova_Vulgata bible

Proverbia 25

¹Hae quoque parabolae Salomonis, quas transcripse runt viri Ezechiae regis Iudae.

²Gloria Dei est celare verbum, et gloria regum investigare sermonem.

³Caelum prae altitudine et terra prae profunditate, et cor regum inscrutabile.

⁴Aufer scorias de argento, et egredietur vas pro argentario.

⁵Aufer impium de conspectu regis, et firmabitur iustitia thronus eius.

⁶Ne gloriosus appareas coram rege et in loco magnorum ne steteris.

⁷Melius est enim ut dicatur tibi: “ Ascende huc ”, quam ut humilieris coram principe.

⁸Quae viderunt oculi tui, ne proferas in iurgio cito, quoniam quid facies postea, cum dehonestaverit te amicus tuus?

⁹Causam tuam tracta cum amico tuo et secretum extranei ne reveles,

¹⁰ne forte insultet tibi, cum audierit, et contumelia tua revocari non poterit.

¹¹Mala aurea in ornatibus argenteis, verbum prolatum in tempore suo.

¹²Inauris aurea et margaritum fulgens sapiens, qui arguit super aurem audientem.

¹³Sicut frigus nivis in die messis, ita legatus fidelis ei, qui misit eum: animam ipsius recreat.

¹⁴Nubes et ventus et pluviae non sequentes vir gloriosus et promissa non complens.

¹⁵Patientia lenietur princeps, et lingua mollis confringet ossa.

¹⁶Mel invenisti? Comede, quod sufficit tibi, ne forte satiatus evomas illud.

¹⁷Subtrahe pedem tuum de domo proximi tui, ne quando satiatus oderit te.

¹⁸Malleus et gladius et sagitta acuta homo, qui loquitur contra proximum suum falsum testimonium.

¹⁹Dens putridus et pes vacillans, qui sperat super infideli in die angustiae.

²⁰Sicut exuens pallium in die frigoris, sicut acetum in nitro, qui cantat carmina cordi tristi.

²¹Si esurierit inimicus tuus, ciba illum; si sitierit, pota illum:

²²prunas enim congregabis super caput eius, et Dominus reddet tibi.

²³Ventus aquilo parturit pluvias, et faciem tristem lingua detrahens.

²⁴Melius est sedere in angulo domatis quam cum muliere litigiosa et in domo communi.

²⁵Aqua frigida animae sitienti et nuntius bonus de terra longinqua.

²⁶Fons turbatus pede et vena corrupta iustus cadens coram impio.

²⁷Mel nimium comedere non est bonum, nec quaestus gloriae est gloria.

²⁸Urbs diruta et absque muro vir, qui non potest cohibere spiritum suum.