Read Nova_Vulgata Proverbia 27 Bible Online

Proverbia 27 - Nova_Vulgata bible

Proverbia 27

¹Ne glorieris in crastinum ignorans, quid superventura pariat dies.

²Laudet te alienus et non os tuum, extraneus et non labia tua.

³Grave est saxum et onerosa arena, sed ira stulti utroque gravior.

⁴Saevitas et erumpens furor, et coram zelo consistere quis poterit?

⁵Melior est manifesta correptio quam amor absconditus.

⁶Veriora sunt vulnera diligentis quam fraudulenta oscula odientis.

⁷Anima saturata calcabit favum, et anima esuriens etiam amarum pro dulci sumet.

⁸Sicut avis transmigrans de nido suo, sic vir errans longe a loco suo.

⁹Unguento et ture delectatur cor et dulcedine amici in consilio ex animo.

¹⁰Amicum tuum et amicum patris tui ne dimiseris et domum fratris tui ne ingrediaris in die afflictionis tuae. Melior est vicinus iuxta quam frater procul.

¹¹Stude sapientiae, fili mi, et laetifica cor meum, ut possim exprobranti mihi respondere sermonem.

¹²Astutus videns malum absconditus est; simplices transeuntes multati sunt.

¹³Tolle vestimentum eius, qui spopondit pro extraneo, et pro alienis aufer ei pignus.

¹⁴Qui benedicit proximo suo voce grandi mane consurgens, maledictio reputabitur ei.

¹⁵Tecta perstillantia in die frigoris et litigiosa mulier comparantur;

¹⁶qui retinet eam, quasi qui ventum teneat, et oleum dextera sua tenere reperietur.

¹⁷Ferrum ferro exacuitur, et homo exacuit faciem amici sui.

¹⁸Qui servat ficum, comedet fructus eius; et, qui custos est domini sui, glorificabitur.

¹⁹Quomodo in aqua facies prospicit ad faciem, sic cor hominis ad hominem.

²⁰Infernus et Perditio numquam implentur, similiter et oculi hominum insatiabiles.

²¹Quomodo probatur in conflatorio argentum et in fornace aurum, sic probatur homo ore laudantis.

²²Si pilo contuderis stultum in pila quasi ptisanas, non auferetur ab eo stultitia eius.

²³Diligenter agnosce vultum pecoris tui; appone cor tuum ad greges,

²⁴non enim habebis iugiter divitias. Num corona tribuetur in generationem et generationem?

²⁵Nudata sunt prata, et apparuerunt herbae virentes, et collecta sunt fena de montibus;

²⁶agni ad vestimentum tuum, et haedi ad agri pretium;

²⁷sufficiat tibi lac caprarum in cibum tuum et in cibum domus tuae et ad victum ancillis tuis.