Read Nova_Vulgata Proverbia 30 Bible Online

Proverbia 30 - Nova_Vulgata bible

Proverbia 30

¹Verba Agur filii Iaces ex Massa. Oraculum hominis ad Itiel, ad Itiel et Ucal.

²Quoniam stultissimus sum virorum, et sapientia hominum non est mecum;

³et non didici sapientiam et scientiam sanctorum non novi.

⁴Quis ascendit in caelum atque descendit? Quis continuit spiritum in manibus suis? Quis colligavit aquas quasi in vestimento? Quis statuit omnes terminos terrae? Quod nomen est eius, et quod nomen filii eius, si nosti?

⁵Omnis sermo Dei probatus clipeus est sperantibus in eum.

⁶Ne addas quidquam verbis illius: et arguaris inveniarisque mendax.

⁷Duo rogavi te, ne deneges mihi, antequam moriar:

⁸vanitatem et verba mendacia longe fac a me, mendicitatem et divitias ne dederis mihi, tribue tantum victum demensum mihi,

⁹ne forte satiatus illiciar ad negandum et dicam: “ Quis est Dominus? ” aut egestate compulsus furer et periurem nomen Dei mei.

¹⁰Ne calumnieris servum ad dominum suum, ne forte maledicat tibi, et puniaris.

¹¹Generatio, quae patri suo maledicit et quae matri suae non benedicit.

¹²Generatio, quae sibi munda videtur et non est lota a sordibus suis.

¹³Generatio, cuius oculi quam excelsi sunt, et palpebrae eius in alta surrectae!

¹⁴Generatio, quae pro dentibus gladios habet, et cultri molares eius, ut comedat inopes de terra et pauperes ex hominibus.

¹⁵Sanguisugae duae sunt filiae: “ Affer, affer! ”. Tria sunt insaturabilia, et quattuor, quae numquam dicunt: “ Sufficit! ”:

¹⁶infernus et venter sterilis, terra, quae non satiatur aqua, ignis, qui numquam dicit: “ Sufficit! ”.

¹⁷Oculum, qui subsannat patrem et qui despicit obsequium matris suae, effodiant eum corvi de torrente, et comedant eum filii aquilae.

¹⁸Tria sunt nimis difficilia mihi, et quattuor penitus ignoro:

¹⁹viam aquilae in caelo, viam colubri super petram, viam navis in medio mari et viam viri in adulescentula.

²⁰Talis est et via mulieris adulterae, quae comedit et tergens os suum dicit: “ Non sum operata malum ”.

²¹Per tria movetur terra, et quattuor non potest sustinere:

²²per servum, cum regnaverit, per stultum, cum saturatus fuerit cibo,

²³per odiosam mulierem, cum in matrimonio fuerit assumpta, et per ancillam, cum fuerit heres dominae suae.

²⁴Quattuor sunt minima terrae, et ipsa sunt sapientiora sapientibus:

²⁵formicae populus infirmus, quae praeparant in messe cibum sibi;

²⁶hyraces plebs invalida, qui collocant in petra cubile suum;

²⁷regem locusta non habet et egreditur universa per turmas suas;

²⁸stellio manibus nititur et moratur in aedibus regis.

²⁹Tria sunt, quae bene gradiuntur, et quattuor, quae incedunt feliciter:

³⁰leo fortissimus bestiarum ad nullius pavebit occursum,

³¹gallus succinctus lumbos et aries et rex, qui secum habet exercitum.

³²Si stultum te praebuisti, postquam elevatus es in sublime, et si considerasti, ori impone manum.

³³Qui enim fortiter premit lac, exprimit butyrum, et, qui vehementer emungit nares, elicit sanguinem, et, qui provocat iras, producit discordias.