Read Nova_Vulgata Proverbia 6 Bible Online

Proverbia 6 - Nova_Vulgata bible

Proverbia 6

¹Fili mi, si spoponderis pro amico tuo, defixisti apud extraneum manum tuam;

²illaqueatus es verbis oris tui et captus propriis sermonibus.

³Fac ergo, quod dico, fili mi, et temetipsum libera, quia incidisti in manum proximi tui; discurre, prosternere, insta amico tuo.

⁴Ne dederis somnum oculis tuis nec palpebris tuis dormitationem.

⁵Eruere quasi dammula de rete, et quasi avis de manu aucupis.

⁶Vade ad formicam, o piger, et considera vias eius et disce sapientiam.

⁷Quae, cum non habeat ducem nec praeceptorem nec principem,

⁸parat in aestate cibum sibi et congregat in messe, quod comedat.

⁹Usquequo, piger, dormies? Quando consurges e somno tuo?

¹⁰Paululum dormis, paululum dormitas, paululum conseres manus, ut dormias;

¹¹et veniet tibi quasi viator egestas, et pauperies quasi vir armatus.

¹²Homo iniquus, vir inutilis, graditur ore perverso;

¹³annuit oculis, terit pede, digito loquitur.

¹⁴Prava in corde suo machinatur, malum in omni tempore, iurgia seminat.

¹⁵Ideo extemplo veniet perditio sua, et subito conteretur nec habebit medicinam.

¹⁶Sex sunt, quae odit Dominus, et septem detestatur anima eius:

¹⁷oculos sublimes, linguam mendacem, manus effundentes innoxium sanguinem,

¹⁸cor machinans cogitationes pravas, pedes veloces ad currendum in malum,

¹⁹proferentem mendacia, testem fallacem et eum, qui seminat inter fratres discordias.

²⁰Conserva, fili mi, praecepta patris tui et ne reicias legem matris tuae;

²¹liga ea in corde tuo iugiter et circumda gutturi tuo.

²²Cum ambulaveris, dirigent te, cum dormieris, custodient te et, cum evigilaveris, colloquentur tecum.

²³Quia mandatum lucerna est, et lex lux, et via vitae increpatio disciplinae,

²⁴ut custodiant te a muliere mala et a blanda lingua extraneae;

²⁵non concupiscat pulchritudinem eius cor tuum, nec capiaris nutibus illius:

²⁶pretium enim scorti vix est torta panis, mulier autem viri pretiosam animam capit.

²⁷Numquid potest homo abscondere ignem in sinu suo, et vestimenta illius non ardebunt?

²⁸Aut ambulare super prunas, et non comburentur plantae eius?

²⁹Sic qui ingreditur ad mulierem proximi sui; non erit mundus, quicumque tetigerit eam.

³⁰Non contemptui erit fur, cum furatus fuerit, ut esurientem impleat animam.

³¹Deprehensus quoque reddet septuplum et omnem substantiam domus suae tradet.

³²Qui autem adulter est cum muliere, vecors est; perdet animam suam, qui hoc fecerit.

³³Plagam et ignominiam congregat sibi, et opprobrium illius non delebitur.

³⁴Quia zelus est furor viri, et non parcet in die vindictae

³⁵nec accipiet personam tuam in piaculum nec suscipiet dona plurima.