Read Nova_Vulgata Ecclesiastes 12 Bible Online

Ecclesiastes 12 - Nova_Vulgata bible

Ecclesiastes 12

¹Memento Creatoris tui in diebus iuventutis tuae, antequam veniat tempus afflictionis, et appropinquent anni, de quibus dicas: “ Non mihi placent ”;

²antequam tenebrescat sol et lumen et luna et stellae, et revertantur nubes post pluviam;

³quando commovebuntur custodes domus, et nutabunt viri fortissimi, et otiosae erunt molentes imminuto numero, et tenebrescent videntes per foramina,

⁴et claudentur ostia in platea submissa voce molentis, et consurgent ad vocem volucris, et subsident omnes filiae carminis;

⁵excelsa quoque timebunt et formidabunt in via. Florebit amygdalus, reptabit locusta, et dissipabitur capparis, quoniam ibit homo in domum aeternitatis suae, et circuibunt in platea plangentes,

⁶antequam rumpatur funiculus argenteus, et frangatur lecythus aureus, et conteratur hydria super fontem, et confringatur rota super cisternam,

⁷et revertatur pulvis in terram suam, unde erat, et spiritus redeat ad Deum, qui dedit illum.

⁸Vanitas vanitatum, dixit Ecclesiastes, et omnia vanitas.

⁹Cumque esset sapientissimus, Ecclesiastes docuit insuper populum scientiam; ponderavit et investigans composuit parabolas multas.

¹⁰Quaesivit Ecclesiastes verba delectabilia et conscripsit sermones rectissimos ac veritate plenos.

¹¹Verba sapientium sicut stimuli, et quasi clavi defixi sunt magistri collationum; data sunt a pastore uno.

¹²His amplius, fili mi, ne requiras: faciendi plures libros nullus est finis, frequensque meditatio carnis afflictio est.

¹³Finis loquendi, omnibus auditis: Deum time et mandata eius observa; hoc est enim omnis homo.

¹⁴Et cuncta, quae fiunt, adducet Deus in iudicium circa omne occultum, sive bonum sive malum.