Read Nova_Vulgata Canticum Canticorum 3 Bible Online

Canticum Canticorum 3 - Nova_Vulgata bible

Canticum Canticorum 3

¹In lectulo meo per noctes quaesivi, quem diligit anima mea; quaesivi illum et non inveni.

²“ Surgam et circuibo civitatem; per vicos et plateas quaeram, quem diligit anima mea”. Quaesivi illum et non inveni.

³Invenerunt me vigiles, qui circumeunt civitatem: “ Num, quem diligit anima mea, vidistis? ”.

⁴Paululum cum pertransissem eos, inveni, quem diligit anima mea; tenui eum nec dimittam, donec introducam illum in domum matris meae et in cubiculum genetricis meae.

⁵Adiuro vos, filiae Ierusalem, per capreas cervasque camporum, ne suscitetis neque evigilare faciatis dilectam, donec ipsa velit.

⁶Quid hoc, quod ascendit per desertum sicut virgula fumi, aromatizans tus et myrrham et universum pulverem pigmentarii?

⁷En lectulum Salomonis. Sexaginta fortes ambiunt illum ex fortissimis Israel,

⁸omnes tenentes gladios et ad bella doctissimi, uniuscuiusque ensis super femur suum propter timores nocturnos.

⁹Ferculum fecit sibi rex Salomon de lignis Libani;

¹⁰columnas eius fecit argenteas, reclinatorium aureum, sedile purpureum: medium eius stratum ebeneum. Filiae Ierusalem,

¹¹egredimini et videte, filiae Sion, regem Salomonem in diademate, quo coronavit illum mater sua in die desponsationis illius et in die laetitiae cordis eius.