Read Nova_Vulgata Sapientia 10 Bible Online

Sapientia 10 - Nova_Vulgata bible

Sapientia 10

¹Haec illum, qui primus formatus est, pater orbis terrarum, cum solus esset creatus, custodivit et eduxit illum a delicto suo

²et dedit illi virtutem continendi omnia.

³Ab hac ut recessit iniustus in ira sua, in furoribus fraternae caedis deperiit;

⁴propter quem, cum demergeretur terra, sanavit eam iterum sapientia per contemptibile lignum iustum gubernans.

⁵Haec et in consensu nequitiae, cum se nationes confudissent, scivit iustum et conservavit sine querela Deo et super filii viscera fortem custodivit.

⁶Haec iustum a pereuntibus impiis liberavit fugientem, descendente igne in Pentapolim;

⁷cuius adhuc in testimonium nequitiae fumigabunda constat deserta terra, et incertis temporibus fructus habentes arbores, et incredibilis animae memoria stans figmentum salis.

⁸Sapientiam enim praetereuntes non tantum in hoc lapsi sunt, ut ignorarent bona, sed et insipientiae suae reliquerunt hominibus memoriam, ut in his, quae peccaverunt, nec latere potuissent.

⁹Sapientia autem hos, qui eam observant, a laboribus liberavit.

¹⁰Haec profugum irae fratris iustum deduxit per vias rectas et ostendit illi regnum Dei et dedit illi scientiam sanctorum; honestavit illum in laboribus et complevit labores illius.

¹¹In avaritia circumvenientium illum affuit illi et honestum fecit illum.

¹²Custodivit illum ab inimicis et ab insidiantibus tutavit illum; et post certamen forte bravium dedit illi, ut sciret quoniam omnium potentior est pietas.

¹³Haec venditum iustum non dereliquit, sed a peccato liberavit eum;

¹⁴descenditque cum illo in foveam et in vinculis non dereliquit illum, donec afferret illi sceptrum regni et potentiam adversus eos, qui eum deprimebant, et mendaces ostendit, qui maculaverunt illum, et dedit illi claritatem aeternam.

¹⁵Haec populum sanctum et semen sine querela liberavit a nationibus, quae illum deprimebant.

¹⁶Intravit in animam servi Domini et stetit contra reges horrendos in portentis et signis.

¹⁷Reddidit sanctis mercedem laborum suorum et deduxit illos in via mirabili et fuit illis in velamento diei et in luce stellarum per noctem.

¹⁸Transtulit illos per mare Rubrum et transvexit illos per aquam nimiam

¹⁹inimicos autem illorum demersit et ab altitudine abyssi eduxit illos.

²⁰Ideo iusti tulerunt spolia impiorum et decantaverunt, Domine, nomen sanctum tuum et victricem manum tuam laudaverunt unanimiter,

²¹quoniam sapientia aperuit os mutorum et linguas infantium fecit disertas.