Read Nova_Vulgata Sapientia 11 Bible Online

Sapientia 11 - Nova_Vulgata bible

Sapientia 11

¹Direxit opera eorum in manibus prophetae sancti.

²Iter fecerunt per deserta, quae non habitabantur, et in locis inviis fixerunt casas;

³steterunt contra hostes et de inimicis se vindicaverunt.

⁴Sitierunt et invocaverunt te; et data est illis aqua de petra altissima, et remedium sitis de lapide duro.

⁵Per quae enim poenas passi sunt inimici illorum, per haec, cum illis deessent, bene cum illis actum est.

⁶Nam pro fonte quidem perennis fluminis, tabescente sanguine turbidi

⁷in traductionem decreti infanticidae, dedisti illis abundantem aquam insperate,

⁸ostendens per sitim, quae tunc fuit, quemadmodum adversarios excruciares.

⁹Cum enim tentati sunt, etsi cum misericordia disciplinam accipientes, scierunt quemadmodum cum ira iudicati impii tormenta paterentur.

¹⁰Hos quidem tamquam pater monens probasti, illos autem tamquam durus rex condemnans tormento interrogasti.

¹¹Absentes enim et praesentes similiter torquebantur;

¹²duplex enim illos acceperat taedium et gemitus cum memoria praeteritorum.

¹³Cum enim audirent per sua tormenta bene secum agi, senserunt Dominum.

¹⁴Quem enim in expositione olim proiectum reiecerunt deridentes, in finem eventuum mirati sunt, non similiter iustis sitientes.

¹⁵Pro cogitationibus autem insensatis iniquitatis illorum, in quibus errantes colebant mutos serpentes et bestias supervacuas, immisisti illis multitudinem mutorum animalium in vindictam,

¹⁶ut scirent quia, per quae peccat quis, per haec et torquetur.

¹⁷Non enim impossibilis erat omnipotens manus tua, quae creavit orbem terrarum ex materia informi, immittere illis multitudinem ursorum aut audaces leones

¹⁸aut recens conditas ira plenas ignotas bestias aut vaporem igneum spirantes aut fumi fremitum proferentes aut horrendas ab oculis scintillas fulgurantes,

¹⁹quarum non solum laesura poterat illos exterminare, sed et aspectus per timorem occidere.

²⁰Sed et sine his uno spiritu poterant occidi, persecutionem passi a iustitia, et dispersi per spiritum virtutis tuae. Sed omnia in mensura et numero et pondere disposuisti.

²¹Multum enim valere tibi soli subest semper, et virtuti brachii tui quis resistet?

²²Quoniam tamquam momentum staterae, sic est ante te totus orbis terrarum, et tamquam gutta roris antelucani, quae descendit in terram.

²³Sed misereris omnium, quia omnia potes; et dissimulas peccata hominum propter paenitentiam.

²⁴Diligis enim omnia, quae sunt, et nihil odisti eorum, quae fecisti; nec enim, si odisses, aliquid constituisses.

²⁵Quomodo autem posset aliquid permanere, nisi tu voluisses? Aut, quod a te vocatum non esset, conservaretur?

²⁶Parcis autem omnibus, quoniam tua sunt, Domine, qui amas animas.