Read Nova_Vulgata Sapientia 16 Bible Online

Sapientia 16 - Nova_Vulgata bible

Sapientia 16

¹Propter haec per his similia castigati sunt digne et per multitudinem bestiarum tormenta passi sunt.

²Pro qua castigatione bene disponens populum tuum ad concupiscentiam delectamenti sui, novum saporem, escam parasti eis ortygometram:

³ut illi quidem concupiscentes escam propter foeditatem eorum animalium, quae missa sunt, etiam a necessaria concupiscentia averterentur; hi autem in brevi inopes facti etiam novam gustarent escam.

⁴Oportebat enim illis quidem sine excusatione supervenire interitum exercentibus tyrannidem, his autem tantum ostendere quemadmodum inimici eorum exterminabantur.

⁵Etenim, cum illis supervenit saeva bestiarum ira, morsibus perversorum colubrorum exterminabantur; sed non in perpetuum ira tua permansit,

⁶sed ad correptionem in brevi turbati sunt, signum habentes salutis ad commemorationem mandati legis tuae.

⁷Qui enim conversus est, non per hoc, quod videbat, sanabatur, sed per te omnium salvatorem.

⁸In hoc autem ostendisti inimicis nostris quia tu es, qui liberas ab omni malo.

⁹Illos enim locustarum et muscarum occiderunt morsus, et non est inventa sanitas animae illorum, quia digni erant ab huiusmodi exterminari;

¹⁰filios autem tuos nec draconum venenatorum vicerunt dentes: misericordia enim tua adveniens sanabat illos.

¹¹In memoriam enim sermonum tuorum pungebantur et velociter salvabantur, ne in altam incidentes oblivionem non possent distrahi a tua beneficientia.

¹²Etenim neque herba neque malagma sanavit eos, sed tuus, Domine, sermo, qui sanat omnia.

¹³Tu enim vitae et mortis habes potestatem, et deducis ad portas mortis et reducis.

¹⁴Homo autem occidit quidem per malitiam suam et spiritum, qui exierit, restituere non potest, nec liberare animam, quae recepta est.

¹⁵Sed tuam manum effugere impossibile est:

¹⁶negantes enim te nosse impii per fortitudinem brachii tui flagellati sunt, novis pluviis et grandinibus et imbribus persecutionem passi et per ignem consumpti.

¹⁷Quod enim valde mirabile erat, in aqua, quae omnia exstinguit, plus ignis valebat; vindex est enim orbis iustorum.

¹⁸Quodam enim tempore mansuetabatur flamma, ne combureret, quae ad impios missa erant, animalia, sed ut ipsi videntes scirent quoniam Dei iudicio patiuntur persecutionem.

¹⁹Quodam autem tempore et in medio aquarum supra virtutem ignis exardescit, ut iniquae terrae genimina exterminet.

²⁰Pro quibus angelorum esca nutrivisti populum tuum et paratum panem de caelo praestitisti illis sine labore, omne delectamentum in se habentem et ad omnem gustum aptum.

²¹Substantia enim tua dulcedinem tuam in filios ostendebat; et deserviens sumentis voluntati, ad quod quisque volebat, convertebatur.

²²Nix autem et glacies sustinebant ignem et non tabescebant, ut scirent quoniam fructus inimicorum exterminabat ignis ardens in grandine et in pluviis coruscans;

²³hic autem iterum, ut nutrirentur iusti, etiam suae virtutis oblitus est.

²⁴Creatura enim tibi Factori deserviens invalescit in tormentum adversus iniustos et lenior fit ad benefaciendum pro his, qui in te confidunt.

²⁵Propter hoc, et tunc in omnia transfigurata, omnium nutrici gratiae tuae deserviebat ad voluntatem eorum, qui a te desiderabant,

²⁶ut discerent filii tui, quos dilexisti, Domine, quoniam non nativitates fructuum pascunt homines, sed sermo tuus credentes in te conservat.

²⁷Quod enim ab igne non poterat exterminari, statim ab exiguo radio solis calefactum tabescebat,

²⁸ut notum esset quoniam oportet praevenire solem ad benedictionem tuam et ad ortum lucis te adorare.

²⁹Ingrati enim spes tamquam hibernalis glacies tabescet et disperiet tamquam aqua supervacua.