Read Nova_Vulgata Sapientia 7 Bible Online

Sapientia 7 - Nova_Vulgata bible

Sapientia 7

¹Sum quidem et ego mortalis homo similis omnibus et ex genere terreni illius, qui prior factus est, et in ventre matris figuratus sum caro;

²decem mensium tempore coagulatus in sanguine ex semine viri et delectamento somni conveniente.

³Et ego natus traxi communem aerem et decidi in terram, quae omnia similiter patitur, prima voce simili omnibus pariter plorans.

⁴In involumentis nutritus sum et curis;

⁵nullus enim rex aliud habuit nativitatis initium.

⁶Unus autem introitus est omnibus ad vitam, et similis exitus.

⁷Propter hoc optavi, et datus est mihi sensus; et invocavi, et venit in me spiritus sapientiae.

⁸Praeposui illam regnis et sedibus et divitias nihil esse duxi in comparatione illius;

⁹nec comparavi illi lapidem pretiosum, quoniam omne aurum in comparatione illius arena est exigua, et tamquam lutum aestimabitur argentum in conspectu illius.

¹⁰Super salutem et speciem dilexi illam et proposui pro luce habere illam, quoniam inexstinguibile est lumen illius.

¹¹Venerunt autem mihi omnia bona pariter cum illa, innumerabiles divitiae in manibus illius,

¹²et laetatus sum in omnibus, quoniam sapientia antecedit ista, et ignorabam quoniam horum omnium mater est;

¹³quam sine fictione didici et sine invidia communico; divitias illius non abscondo.

¹⁴Infinitus enim thesaurus est hominibus; quem qui acquisierunt, ad amicitiam in Deum se paraverunt propter disciplinae dona commendati.

¹⁵Mihi autem det Deus dicere secundum sententiam et sentire digna horum, quae mihi data sunt, quoniam ipse sapientiae dux est et sapientium emendator;

¹⁶in manu enim illius et nos et sermones nostri et omnis sapientia et operum scientia.

¹⁷Ipse enim dedit mihi horum, quae sunt, scientiam veram, ut sciam dispositionem orbis terrarum et virtutes elementorum,

¹⁸initium et consummationem et medietatem temporum, vicissitudinum permutationes et commutationes temporum,

¹⁹anni cursus et stellarum dispositiones,

²⁰naturas animalium et iras bestiarum, vim spirituum et cogitationes hominum, differentias virgultorum et virtutes radicum.

²¹Et, quaecumque sunt absconsa et manifesta, didici; omnium enim artifex docuit me sapientia.

²²Est enim in illa spiritus intellegens, sanctus, unicus, multiplex, subtilis, mobilis, perspicuus, incoinquinatus, lucidus, innocens, amans bonum, acutus,

²³quem nihil vetat, benefaciens, humanus, benignus, stabilis, certus, securus, omnem habens virtutem, omnia prospiciens et penetrans omnes spiritus intellegibiles, mundos, subtilissimos.

²⁴Omni enim motu mobilior est sapientia; pertransit autem et penetrat omnia propter munditiam.

²⁵Halitus est enim virtutis Dei et emanatio claritatis Omnipotentis sincera; ideo nihil inquinatum in eam incurrit:

²⁶candor est enim lucis aeternae et speculum sine macula Dei potentiae et imago bonitatis illius.

²⁷Et, cum sit una, omnia potest; et in se permanens, omnia innovat et per generationes in animas sanctas se transferens amicos Dei et prophetas constituit.

²⁸Nihil enim diligit Deus, nisi eum, qui cum sapientia inhabitat.

²⁹Est enim haec speciosior sole et super omnem dispositionem stellarum; luci comparata invenitur splendidior:

³⁰illi enim succedit nox, sapientiam autem non vincit malitia.