Read Nova_Vulgata Ecclesiasticus 1 Bible Online

Ecclesiasticus 1 - Nova_Vulgata bible

Ecclesiasticus 1

¹Cum multa nobis et magna per Legem et Prophetas aliosque, qui secuti sunt illos, data sint, in quibus oportet laudare Israel doctrinae et sapientiae causa, cumque non solum ipsos legentes necesse sit fieri peritos, sed etiam extraneis posse sapientiae studiosos et dicentes et scribentes utiles fieri, avus meus Iesus, postquam se amplius dedit ad diligentiam lectionis Legis et Prophetarum et aliorum librorum, qui nobis a parentibus nostris traditi sunt, atque in his sufficientem usum acquisivit, voluit et ipse scribere aliquid horum, quae ad doctrinam et sapientiam pertinent, ut desiderantes discere et illorum periti facti magis magisque attendant animo et confirmentur per legitimam vitam. Hortor itaque venire vos cum benevolentia et attentiore studio lectionem facere et veniam habere in illis, in quibus interpretationi adlaborantes videamur quibusdam verbis deficere. Nam deficiunt verba Hebraica, quando fuerint translata ad alteram linguam; non autem solum haec, sed et ipsa Lex et Prophetae ceteraque ali(...)

²Arenam maris et pluviae guttas et dies saeculi quis dinumeravit? Altitudinem caeli et latitudinem terrae et profundum abyssi quis mensus est?

³Sapientiam Dei praecedentem omnia quis investigavit?

⁴Prior omnium creata est sapientia, et intellectus prudentiae ab aevo.

⁵Fons sapientiae verbum Dei in excelsis, et ingressus illius mandata aeterna.

⁶Radix sapientiae cui revelata est? Et astutias illius quis agnovit?

⁷Disciplina sapientiae cui revelata est et manifestata? Et multiplicem peritiam illius quis intellexit?

⁸Unus est Altissimus, creator omnipotens et rex potens et metuendus nimis, sedens super thronum suum et dominans, Deus.

⁹Ipse creavit illam in spiritu sancto et vidit et dinumeravit et mensus est;

¹⁰et effudit illam super omnia opera sua et super omnem carnem secundum largitatem suam et praebuit illam diligentibus se.

¹¹Timor Domini gloria et gloriatio et laetitia et corona exsultationis.

¹²Timor Domini delectabit cor et dabit laetitiam et gaudium et longitudinem dierum.

¹³Timenti Dominum bene erit in extremis, et in die defunctionis suae benedicetur.

¹⁴Dilectio Dei honorabilis sapientia;

¹⁵quibus autem apparuerit, dispertit eam in visionem sui ipsius et in agnitione magnalium suorum.

¹⁶Initium sapientiae timor Domini, et cum fidelibus in vulva concreata est; cum hominibus veritatis ab aevo fundata est et semini eorum se credet.

¹⁷Timor Domini scientiae religiositas;

¹⁸religiositas custodiet et iustificabit cor, iucunditatem atque gaudium dabit.

²⁰Plenitudo sapientiae est timere Deum; et inebriat eos fructibus suis.

²¹Omnem domum illius implebit rebus pretiosis et receptacula thesauris illius.

²²Corona sapientiae timor Domini, repollens pacem et salutis fructum:

²³utraque autem sunt dona Dei.

²⁴Scientiam et intellectum prudentiae sapientia effundit quasi pluviam; et gloriam tenentium se exaltat.

²⁵Radix sapientiae est timere Dominum, et rami illius longaevi.

²⁶In thesauris sapientiae intellectus et scientiae religiositas; exsecratio autem peccatoribus sapientia.

²⁷Timor Domini expellit peccatum; cum autem adsit, omnem avertit iram.

²⁸Nam, qui sine timore est, non poterit iustificari; iracundia enim animositatis illius subversio illi erit.

²⁹Usque in tempus sustinebit patiens, et postea erit redditio iucunditatis.

³⁰Bonus sensus usque in tempus abscondet verba illius, et labia multorum enarrabunt sensum illius.

³¹In thesauris sapientiae parabola disciplinae;

³²exsecratio autem peccatori cultura Dei.

³³Fili, concupiscens sapientiam conserva iustitiam, et Deus praebebit illam tibi.

³⁴Sapientia enim et disciplina timor Domini, et quod beneplacitum est illi,

³⁵fides et mansuetudo.

³⁶Ne sis incredibilis timori Domini et ne accesseris ad illum duplici corde.

³⁷Ne fueris hypocrita in conspectu hominum et cave a labiis tuis.

³⁸Ne extollas teipsum, ne forte cadas et adducas animae tuae inhonorationem,

³⁹et revelet Deus absconsa tua et in medio synagogae elidat te;

⁴⁰quoniam accessisti maligne ad timorem Domini, et cor tuum plenum est dolo et fallacia.