Read Nova_Vulgata Ecclesiasticus 21 Bible Online

Ecclesiasticus 21 - Nova_Vulgata bible

Ecclesiasticus 21

¹Fili, peccasti? Non adicias iterum, sed et de pristinis deprecare, ut tibi dimittantur.

²Quasi a facie colubri fuge peccata: et, si accesseris ad illa, mordebunt te.

³Dentes leonis dentes eorum interficientes animas hominum.

⁴Quasi romphaea bis acuta omnis iniquitas: plagae illius non est sanitas.

⁵Terror et iniuriae annullabunt substantiam, et domus, quae nimis locuples est, annullabitur superbia; sic substantia superbi eradicabitur.

⁶Deprecatio pauperis ex ore usque ad aures Dei perveniet, et iudicium festinato adveniet illi.

⁷Qui odit correptionem, in vestigio est peccatoris; et, qui timet Deum, convertet illam ad cor suum.

⁸Notus a longe potens lingua audaci, et sensatus novit illum labi.

⁹Qui aedificat domum suam impendiis alienis, quasi qui colligit lapides suos in hiemem.

¹⁰Stuppa collecta synagoga peccantium, et consummatio illorum flamma ignis.

¹¹Via peccantium complanata lapidibus, et in fine illius fovea inferi.

¹²Qui custodit legem, continebit sensum suum;

¹³consummatio timoris Dei sapientia et sensus.

¹⁴Non erudietur, qui non est prudens;

¹⁵est autem astutia, quae abundat in malo, et non est sensus, ubi est amaritudo.

¹⁶Scientia sapientis tamquam inundatio abundabit, et consilium illius sicut fons vitae permanet.

¹⁷Cor fatui quasi vas confractum et omnem sapientiam non tenebit.

¹⁸Verbum sapiens, quodcumque audierit scius, laudabit et ad illud adiciet; audivit luxuriosus, et displicebit illi et proiciet illud post dorsum suum.

¹⁹Narratio fatui quasi sarcina in via, sed in labiis sensati invenietur gratia.

²⁰Os prudentis quaeretur in ecclesia, et verba illius cogitabunt in cordibus suis.

²¹Tamquam domus exterminata sic fatuo sapientia; et scientia insensati inenarrabilia verba.

²²Compedes in pedibus stulto doctrina et quasi vincula manuum super manum dexteram.

²³Fatuus in risu exaltat vocem suam; vir autem sapiens vix tacite ridebit.

²⁴Tamquam ornamentum aureum prudenti doctrina et quasi brachiale in brachio dextro.

²⁵Pes fatui facilis in domum proximi, sed homo peritus verebitur personam.

²⁶Stultus a fenestra respiciet in domum, vir autem eruditus foris stabit.

²⁷Ineruditio hominis auscultare per ostium, et prudenti gravis contumelia.

²⁸Labia imprudentium stulta narrabunt, verba autem prudentium statera ponderabuntur.

²⁹In ore fatuorum cor illorum, et in corde sapientium os illorum.

³⁰Dum maledicit impius adversarium, maledicit ipse animam suam.

³¹Susurro coinquinabit animam suam et in omnibus odietur; et, qui cum eo manserit, odiosus erit: tacitus et sensatus honorabitur.