Read Nova_Vulgata Ecclesiasticus 27 Bible Online

Ecclesiasticus 27 - Nova_Vulgata bible

Ecclesiasticus 27

¹Propter lucrum multi deliquerunt; et, qui quaerit locupletari, avertet oculum suum.

²Sicut in medio compaginis lapidum palus figitur, sic et inter medium venditionis et emptionis constringitur peccatum.

⁴Si non in timore Domini tenueris te, instanter cito subvertetur domus tua.

⁵Sicut in percussura cribri remanent quisquiliae, sic peripsemata hominis in cogitatu illius.

⁶Vasa figuli probat fornax, et homines iustos tentatio tribulationis.

⁷Sicut rusticationem ligni ostendit fructus illius, sic verbum ex cogitatu cordis hominis.

⁸Ante sermonem non laudes virum: haec enim tentatio est hominum.

⁹Si sequaris iustitiam, apprehendes illam et indues quasi poderem honoris et inhabitabis cum ea, et proteget te in sempiternum, et in die agnitionis invenies firmamentum.

¹⁰Volatilia ad sibi similia conveniunt, et veritas ad eos, qui operantur illam, revertetur.

¹¹Leo venationi insidiatur semper, sic peccata operantibus iniquitates.

¹²Loquela timorati semper in sapientia manet; stultus autem sicut luna mutatur.

¹³In medio insensatorum serva tempus, in medio autem cogitantium assiduus esto.

¹⁴Loquela stultorum odiosa, et risus illorum in deliciis peccati.

¹⁵Loquacitas multum iurantis horripilationem capiti statuet, et rixa illorum obturatio aurium.

¹⁶Effusio sanguinis rixa superborum, et maledictio illorum auditus gravis.

¹⁷Qui denudat arcana, amici fidem perdit et non inveniet amicum ad animum suum:

¹⁸dilige amicum et coniungere fide cum illo;

¹⁹quod, si denudaveris absconsa illius, non persequeris post eum.

²⁰Sicut enim homo, qui extulit mortuum suum, sic et qui perdit amicitiam proximi sui;

²¹et sicut qui dimittit avem de manu sua, sic dereliquisti proximum tuum et non eum capies.

²²Non illum sequaris, quoniam longe abest; effugit enim quasi caprea de laqueo, quoniam vulnerata est anima eius;

²³ultra eum non poteris colligare. Et maledicti est concordatio,

²⁴denudare autem amici mysteria amputatio spei est.

²⁵Annuens oculo fabricat iniqua; qui novit eum, recedet ab illo.

²⁶In conspectu oculorum tuorum condulcabit os suum et super sermones tuos admirabitur; novissime autem pervertet os suum et in verbis tuis dabit scandalum.

²⁷Multa odivi et non coaequavi ei, et Dominus odiet illum.

²⁸Qui in altum mittit lapidem, super caput eius cadet, et plaga dolosa dolosi dividet vulnera.

²⁹Qui foveam fodit, incidet in eam, et, qui statuit lapidem proximo, offendet in eo, et, qui laqueum alii ponit, capietur in illo.

³⁰Facienti nequissimum consilium, super ipsum devolvetur, et non agnoscet, unde adveniat illi.

³¹Illusio et improperium superbo, et vindicta sicut leo insidiabitur illi.

³²Laqueo capientur, qui oblectantur casu iustorum, dolor autem consumet illos, antequam moriantur.

³³Ira et furor utraque exsecrabilia sunt, et vir peccator continens erit illorum.