Read Nova_Vulgata Ecclesiasticus 33 Bible Online

Ecclesiasticus 33 - Nova_Vulgata bible

Ecclesiasticus 33

¹Timenti Dominum non occurrent mala, sed in tentatione Deus illum iterum conservabit et liberabit a malis.

²Sapiens non odit mandata et iustitias et non illidetur quasi in procella navis.

³Homo sensatus credit verbo Dei, et lex illi fidelis sicut qui interrogationem manifestat.

⁴Para verba et sic deprecatus exaudieris et conservabis disciplinam et tunc respondebis.

⁵Praecordia fatui quasi rota carri, et quasi axis versatilis cogitatus illius.

⁶Equus admissarius, sic et amicus subsannator: sub omni suprasedente hinnit.

⁷Quare dies diem superat, si omnis lux anni a sole?

⁸A Domini scientia separati sunt,

⁹et immutavit tempora et dies festos ipsorum.

¹⁰Ex ipsis exaltavit et magnificavit Deus et ex ipsis posuit in numerum dierum. Et omnes homines de solo, et ex terra creatus est Adam.

¹¹In multitudine disciplinae Dominus separavit eos et immutavit vias eorum:

¹²ex ipsis benedixit et exaltavit et ex ipsis sanctificavit et ad se applicavit; ex ipsis maledixit et humiliavit et convertit illos a statione ipsorum.

¹³Quasi lutum figuli in manu ipsius plasmare illud et disponere

¹⁴secundum beneplacitum eius, sic homo in manu illius, qui se fecit et reddet illi secundum iudicium suum.

¹⁵Contra malum bonum est, et contra mortem vita; sic et contra virum iustum peccator. Et sic intuere in omnia opera Altissimi, duo et duo, et unum contra unum.

¹⁶Et ego novissimus evigilavi et, quasi qui colligit acinos post vindemiatores,

¹⁷in benedictione Dei et ipse praecessi et, quasi qui vindemiat, replevi torcular.

¹⁸Respicite quoniam non mihi soli laboravi sed omnibus exquirentibus disciplinam.

¹⁹Audite me, magnates populi; et rectores ecclesiae, auribus percipite.

²⁰Filio et mulieri, fratri et amico non des potestatem super te in vita tua; et non dederis alii possessionem tuam, ne forte paeniteat te et depreceris pro illis.

²¹Dum adhuc superes et aspiras, non commutes teipsum cum omni carne.

²²Melius est enim, ut filii tui te rogent, quam te respicere in manus filiorum tuorum.

²³In omnibus operibus tuis praecellens esto,

²⁴ne dederis maculam in gloria tua. In die consummationis dierum vitae tuae et in tempore exitus tui distribue hereditatem tuam.

²⁵Cibaria et virga et onus asino, panis et disciplina et opus servo.

²⁶Operare per servum et invenies requiem; laxa manus illi, et quaeret libertatem.

²⁷Iugum et lorum curvant collum, et servum inclinant operationes assiduae.

²⁸Servo malevolo tortura et compedes, mitte illum in operationem, ne vacet:

²⁹multam enim malitiam docuit otiositas.

³⁰In opera constitue eum, sic enim condecet illum; quod si non obaudierit, curva illum compedibus, sed non immoderate in omnem carnem; verum sine iudicio nihil facias grave.

³¹Si est tibi servus unicus, sit tibi quasi anima tua, quoniam sicut te indigebis illo. Si est tibi servus unicus, quasi fratrem sic eum tracta, ne in sanguinem animae tuae irascaris.

³²Si laeseris eum iniuste, in fugam convertetur;

³³et, si surgens discesserit, in qua via quaeras illum, nescis.