Read Nova_Vulgata Ecclesiasticus 34 Bible Online

Ecclesiasticus 34 - Nova_Vulgata bible

Ecclesiasticus 34

¹Vana spes et mendax viro insensato, et somnia extollunt imprudentes.

²Quasi qui apprehendit umbram et persequitur ventum, sic et qui attendit ad visa noctis.

³Hoc secundum hoc visio somniorum, ante faciem hominis similitudo faciei.

⁴Ab immundo quid mundabitur? Et a mendace quid verum dicetur?

⁵Divinationes et auguria et somnia vanitas est,

⁶et, sicut parturientis, cor phantasias patitur. Nisi ab Altissimo fuerit emissa visitatio, ne dederis in illis cor tuum.

⁷Multos enim errare fecerunt somnia, et exciderunt sperantes in illis.

⁸Sine mendacio consummabitur verbum legis, et sapientia in ore fideli consummatio.

⁹Vir, qui peregrinatus est, multa didicit, et, qui multa expertus est, enarrabit scienter.

¹⁰Qui non est expertus, pauca recognoscit, qui autem peregrinatus est, multiplicat astutiam.

¹²Multa vidi errando et plurima verba intellexi;

¹³aliquoties usque ad mortem periclitatus sum et horum causa liberatus sum.

¹⁴Spiritus timentium Dominum vivet, et in respectu illius benedicetur.

¹⁵Spes enim illorum in salvantem illos, et oculi Dei in diligentes se.

¹⁶Qui timet Dominum, nihil trepidabit et non pavebit, quoniam ipse est spes eius.

¹⁷Timentis Dominum beata est anima eius.

¹⁸Ad quem respicit? Et quis est fortitudo eius?

¹⁹Oculi Domini super timentes eum: protector potentiae, firmamentum virtutis, tegimen ardoris et umbraculum meridiani,

²⁰custodia offensionis et adiutorium casus, exaltans animam et illuminans oculos, dans sanitatem vitae et benedictionem.

²¹Dominus solus sustinentibus se in via veritatis et iustitiae.

²²Immolantis ex iniquo, oblatio maculata, et non sunt beneplacitae hostiae iniustorum.

²³Dona iniquorum non probat Altissimus nec respicit in oblationes iniquorum nec in multitudine sacrificiorum eorum propitiabitur peccatis.

²⁴Qui offert sacrificium ex substantia pauperum, quasi qui victimat filium in conspectu patris sui.

²⁵Panis egentium vita pauperum est; qui defraudat illum, homo sanguinis est.

²⁶Qui aufert in sudore panem, quasi qui occidit proximum suum;

²⁷et effundit sanguinem, qui fraudem facit mercennario.

²⁸Unus aedificans et unus destruens; quid prodest illis nisi labor?

²⁹Unus orans et unus maledicens; cuius vocem exaudiet Deus?

³⁰Qui baptizatur a mortuo et iterum tangit eum: quid proficit lavatio illius?

³¹Sic homo, qui ieiunat pro peccatis suis, et iterum vadens et eadem faciens. Orationem illius quis exaudiet? Aut quid proficit humiliando se?