Read Nova_Vulgata Ecclesiasticus 37 Bible Online

Ecclesiasticus 37 - Nova_Vulgata bible

Ecclesiasticus 37

¹Omnis amicus dicet: “ Et ego amicitiam copulavi! ”; sed est amicus solo nomine amicus. Nonne tristitia appropinquans usque ad mortem:

²sodalis et amicus ad inimicitiam conversus?

³O praesumptio nequissima, unde creata es cooperire aridam malitia et dolositate illius?

⁴Sodalis amico coniucundatur in oblectationibus et in tempore tribulationis adversarius erit;

⁵sodalis amico condolet causa ventris et contra hostem accipiet scutum.

⁶Non obliviscaris amici tui in animo tuo et non immemor sis illius in opibus tuis.

⁷Noli consiliari cum eo, qui tibi insidiatur, et a zelantibus te absconde consilium.

⁸Omnis consiliarius prodit consilium, sed est consiliarius pro semetipso.

⁹A consiliario serva animam tuam et prius scito quae sit illius necessitas et ipse enim animo suo cogitabit

¹⁰ne forte mittat super te sortem et dicat tibi:

¹¹“ Bona est via tua ” et stet e contrario videre quid tibi eveniat.

¹²Noli consiliari cum invido et a zelante te consilium absconde; nec cum muliere de ea, quae ei aemulatur, cum timido de bello, cum negotiatore de traiecticio, cum emptore de venditione, cum viro livido de gratiis agendis,

¹³cum impio de pietate, cum inhonesto de honestate, cum operario otioso de omni opere,

¹⁴cum mercennario annuali de consummatione anni, cum servo pigro de multa operatione: non attendas his in omni consilio.

¹⁵Sed cum viro timorato assiduus esto, quemcumque cognoveris observantem mandata,

¹⁶cuius anima est secundum animam tuam, et qui, cum titubaveris in tenebris, condolebit tibi.

¹⁷Et consilium cordis statue tecum; non est enim tibi aliud fidelius illo.

¹⁸Anima viri enuntiat aliquando vera quam septem circumspectores sedentes in excelso ad speculandum.

¹⁹Et in his omnibus deprecare Altissimum, ut dirigat in veritate viam tuam.

²⁰Ante omnia opera verbum verax praecedat te, et ante omnem actum consilium stabile.

²¹Radix consiliorum cor, ex quo partes quattuor oriuntur: bonum et malum, vita et mors; et dominatrix illorum est assidua lingua.

²²Est vir peritus multorum eruditor et animae suae inutilis est.

²³Est qui sophistice loquitur et odibilis est; in omni cibo voluptatis defraudabitur.

²⁴Non est illi data a Domino gratia: omni enim sapientia defraudatus est.

²⁵Est sapiens animae suae sapiens, et fructus sensus illius super corpus suum.

²⁶Vir sapiens plebem suam erudit, et fructus sensus illius fideles sunt.

²⁷Vir sapiens implebitur benedictionibus, et omnes videntes illum beatum dicent.

²⁸Vita viri in numero dierum; dies autem Israel innumerabiles sunt.

²⁹Sapiens in populo hereditabit honorem, et nomen illius erit vivens in aeternum.

³⁰Fili, in vita tua tenta animam tuam et vide si quid obnoxium ei est: non des illi.

³¹Non enim omnia omnibus expediunt, et non omni animae omne genus placet.

³²Noli avidus esse in omni epulatione et non te effundas super omnem escam.

³³In multis enim escis erit infirmitas, et aviditas appropinquabit usque ad choleram.

³⁴Propter crapulam multi obierunt; qui autem abstinens est, adiciet vitam.