Read Nova_Vulgata Ecclesiasticus 41 Bible Online

Ecclesiasticus 41 - Nova_Vulgata bible

Ecclesiasticus 41

¹O mors, quam amara est memoria tua homini pacem habenti in substantiis suis,

²viro quieto et, cuius viae directae sunt in omnibus, et adhuc valenti accipere voluptatem!

³O mors, bonum est iudicium tuum homini indigenti et, qui minoratur viribus,

⁴defecto aetate et, cui de omnibus cura est, qui fiduciam amisit et perdidit patientiam!

⁵Noli metuere iudicium mortis; memento eorum, qui ante te fuerunt et qui superventuri sunt tibi: hoc iudicium a Domino omni carni;

⁶et quid resistis beneplacito Altissimi? Sive decem sive centum sive mille anni,

⁷non est enim in inferno accusatio vitae.

⁸Filii abominationum fiunt filii peccatorum, et qui conversantur in sedibus impiorum;

⁹filiorum peccatorum periet hereditas, et cum semine illorum assiduitas opprobrii.

¹⁰De patre impio queruntur filii, quoniam propter illum sunt in opprobrio.

¹¹Vae vobis, viri impii, qui dereliquistis legem Domini Altissimi!

¹²Et, si nati fueritis, in maledictione nascemini; et, si mortui fueritis, in maledictione erit pars vestra.

¹³Omnia, quae de terra sunt, in terram convertentur, sic impii a maledicto in perditionem.

¹⁴Luctus hominum in corpore ipsorum; nomen autem impiorum non bonum delebitur.

¹⁵Curam habe de bono nomine; hoc enim magis permanebit tibi quam mille thesauri pretiosi et magni:

¹⁶bonae vitae numerus dierum, bonum autem nomen permanebit in aevum.

¹⁷Melior est homo, qui abscondit stultitiam suam, quam homo, qui abscondit sapientiam suam. Sapientia enim abscondita et thesaurus invisibilis, quae utilitas in utrisque?

¹⁸Disciplinam in pace conservate, filii;

¹⁹verumtamen reveremini iudicium meum:

²⁰non est enim bonum omnem reverentiam observare, et non omnis pudor probatus.

²¹Erubescite a patre et a matre de fornicatione et a praesidente et a potente de mendacio,

²²a principe et a iudice de delicto, a synagoga et plebe de iniquitate,

²³a socio et amico de iniustitia et de loco, in quo habitas,

²⁴de furto, de veritate Dei et testamento, de impositione cubiti super mensam et a despectione dati et accepti,

²⁵a salutantibus de silentio, a respectu mulieris fornicariae et ab aversione vultus cognati

²⁶et ab auferendo partem et non restituendo

²⁷et a respiciendo mulierem alieni viri et a curiositate in ancillam eius, neque steteris ad lectum eius;

²⁸ab amicis de sermonibus improperii, et, cum dederis, ne improperes;