Read Nova_Vulgata Ecclesiasticus 43 Bible Online

Ecclesiasticus 43 - Nova_Vulgata bible

Ecclesiasticus 43

¹Gloria altitudinis firmamentum puritatis, species caeli in visione gloriae.

²Sol in apparitione annuntians in processu: vas admirabile, opus Excelsi.

³In meridiano suo exurit terram; et in conspectu ardoris eius quis poterit sustinere? Fornacem ventilans in operibus ardoris tripliciter,

⁴sol exurens montes, vapores igneos exsufflans et refulgens radiis suis obcaecat oculos.

⁵Magnus Dominus, qui fecit illum et sermonibus eius festinavit iter.

⁶Et luna stat in tempus suum, in ostensionem temporis et signum aevi.

⁷A luna signum diei festi; luminare, quod minuitur in consummatione.

⁸Mensis secundum nomen eius est, crescens mirabiliter in consummatione.

⁹Vas castrorum in excelsis, in firmamento caeli resplendens gloriose.

¹⁰Species caeli gloria stellarum, mundum illuminans in excelsis Domini.

¹¹In verbis Sancti stabunt iuxta praeceptum et non deficient in vigiliis suis.

¹²Vide arcum et benedic eum, qui fecit illum; valde speciosus est in splendore suo.

¹³Gyravit caelum in circuitu gloriae suae, manus Excelsi tetenderunt illum.

¹⁴Imperio suo acceleravit nivem et properat coruscationes iudicii sui.

¹⁵Propterea aperti sunt thesauri, et evolaverunt nebulae sicut aves.

¹⁶In magnitudine sua firmavit nubes, et confracti sunt lapides grandinis. Vox tonitrui eius tremefacit terram,

¹⁷in conspectu eius commovebuntur montes. In voluntate eius aspirabit notus,

¹⁸tempestas aquilonis et congregatio spiritus.

¹⁹Et, sicut aves deponentes ad sedendum, aspergit nivem, et, sicut locusta demergens, descensus eius:

²⁰pulchritudinem candoris eius admirabitur oculus, et super imbrem eius expavescet cor.

²¹Gelu sicut salem effundet super terram, et, dum gelaverit, fit tamquam cacumina tribuli.

²²Frigidus ventus aquilo flabit, et gelabit crystallus super aquam; super omnem congregationem aquarum requiescet, et sicut lorica induet se aqua.

²³Devorabit montes et exuret desertum et exstinguet viridem sicut ignis.

²⁴Medicina omnium in festinatione nebulae, et ros obvians ab ardore hilarescet.

²⁵Cogitatione sua placavit abyssum et plantavit in illa insulas.

²⁶Qui navigant mare, enarrant pericula eius, et audientes auribus nostris admiramur.

²⁷Illic praeclara opera et mirabilia, varia bestiarum genera et omnium pecorum et creatura belluarum.

²⁸Propter ipsum iter prosperat angelus eius, et in sermone eius composita sunt omnia.

²⁹Multa dicemus et deficiemus verbis; consummatio autem sermonum: “ Ipse est omnia!”.

³⁰Glorificantes ad quid valebimus? Ipse enim Magnus super omnia opera sua.

³¹Terribilis Dominus et magnus vehementer, et mirabilis potentia ipsius.

³²Glorificantes Dominum exaltate, quantumcumque potueritis: supervalebit enim adhuc, et admirabilis magnificentia eius.

³⁴Exaltantes eum replemini virtute; ne laboretis, non enim pervenietis usquam.

³⁵Quis vidit eum et enarrabit? Et quis magnificabit eum sicut est?

³⁶Multa abscondita sunt maiora his; pauca enim vidimus operum eius.

³⁷Omnia autem Dominus fecit et pie agentibus dedit sapientiam.